Ym dei u Conrad ne Purno hynrei dei ki nong Mylliem ba jied MLA

Shillong, Rymphang 06 : Da ki hajar ngut ki paidbah ki la mih ha kane ka sngi Nyngkong ban synran ïa u kyrtong ka NPP na Mylliem, Bah Hamlet Dohling na bynta ka elekshon MLA kaban sa long ha kane ka 27tarik mynta u bnai.
Nalor ki nongkyrshan jong u Bah Hamlet, kiwei pat ki kyrtong kiba kham pyni jingbun paid ha kane ka sngi ki kynthup naduh u kyrtong ka BJP na Shillong South, Bah Sanbor Shullai bad ruh u kyrtong ka BJP na Pynthorumkhrah Bah AL Hek.
Ha kane ka sngi, ki nongkyrshan jong u Bah Hamlet ki la pynlong ka jingïaid kjat ter ter naduh Barik tad haduh ban da poi sha office u DC, Shillong.
Na ka liang u Bah Hamlet haba kren sha ki lad pathai khubor hadien ba la dep thep kyrteng u la ong ba u don ka jingsngew skhem ba sa shisien pat, ki paidbah nong Mylliem kin sa pynjop biang ïa u ha kane ka kynti ruh.
“Wat hapdeng ka jingpynthut jong u COVID haduh ar snem hynrei nga la pyrshang ban wanrah ïa ki kam pynroi ha Mylliem,” u la ong.
Haba pynshai pat halor ka jingkynthoh da u kyrtong shimet na Mylliem Bah PM Syiem ba u Bah Hamlet un sa shah rem ha u khun (Conrad Sangma) kumba ma u mynshwa u shah rem ha u kpa (Purno A Sangma), utei u kyrtong ka NPP u la ong ba kitei kidei tang ki jingkren kutlad. “Ha kaba khatduh dei ki paidbah ka Mylliem kiba jied ïa u MLA ym dei u Conrad ne Purno,” u la ong.
Na ka liang u bah Hamlet haba pynshai halor ka jingdawa kiba khlem pat urlong kum ka ILP, u la ong ba kane kadei ka bynta kaba hakhmat eh ha kane ka elekshon bad kumjuh ruh ban pynïoh ïa ka jingithuh ïa ka ktien Khasi bad Garo ha ka Khyrnit kaba Phra.
Shuh shuh u la pynshai ruh ba ka jingshim ïa ka rai ban leit ïa khun noh na ka NPP kam dei satia kaba u rai marwei hynrei kadei ka rai kaba la shim da ki paidbah nongkyrshan na baroh ki shnong jong ka constituency.