Kyntait u Dr Jitrendra Singh ba die ka BJP ïa ka tiket sha ki kyrtong
Ainam ïa ka roi ka par ha u Modi
Shillong, Rymphang 06: U Myntri khynnah ka sorkar pdeng ba peit ïa ka tnat Earth Sciences u Dr Jitendra Singh ha ka sngi Nyngkong u la kyntait ba ka BJP ka die ïa ka tiket kumba la kynnoh da kito ki nongïalam kiba duh tiket na ka party ban ïakhun ïa kane ka elekshon
Ha ka jingïakren sha ki lad pathai khubor haba wan synran ïa u Bah AL Hek ban thep kyrteng na bynta kane ka elekshon u Dr Jitendra u la ong ba ka BJP kam ju die tiket kumba leh kiwei ki party bad ka jingai tiket ïa ki kyrtong ban ïakhun ruh ka dei beit da kaba thew tarajur na ka jingtrei shitom bad ka jingdon jingkyrmen ba kin poi sha ka thong.
Haba kren halor ka jingpynkhreh ka BJP ïa kane ka elekshon u Dr Jitendra u la ong ba ka BJP kan leh bha shibun ha kane ka kynti kaba mynta ym kum ha u snem 2018.
U Jitendra u la ong ba u la thikna ba ha kane ka elekshon ka BJP kan ïoh ban thaw sorkar namar ki paidbah ka Meghalaya ki la sngewthuh ïa ka jingdonkam ban don da ka Sorkar Ar Enjin ne ka sorkar BJP ha Delhi bad ka Sorkar BJP ha ka jylla.
“Nga la thikna ba ka BJP mynta ka elekshon ka thaw sorkar marwei namar ki paidbah ki ïohi ïa ki kam ba ka BJP ha ka jingïalam u Myntri Rangbahduh ka ri u Narendra Modi ka la leh ym tang ha Meghalaya hynrei ha baroh kawei ka ri India” u la ong.
Shuh shuh u la kam ba ka jylla Meghalaya bad ka thain shathei lam mihngi baroh kawei ka kylla dur naduh ba shimti u Nenrendra Modi kum u Myntri Rangbahduh ka ri India.
U la ong ba ka jingwan ba khah khah u Modi sha Meghalaya kadei na ka bynta ban pynthikna ba ki kam pynroi ki poi sha ki kyndon kynshrot ka jylla bad sha kiba dei hok ban ïoh namar ka thong jong ka BJP ka long baka roi ka par ban kyntiew ïa u paidbah ka dei ban poi sha kiba dei hok ban ïoh.
Shuh shuh u la bynrap ba hadien 2014 ka jylla Meghalaya ruh ka la sdang kiew bha namar ka BJP ka la shim khia ban kyntiew ïa ka ïoh ka kot jong ka jylla bad dei namar kane ki kompeni ba heh na kiwei ki jylla kila wan poi sha Meghalaya na ka bynta ban wad ïa ki samla ba kin trei hapoh jong ki namar ki tip ba ki samla ki long kiba donsap.
“Ha shuwa 2014, ka Meghalaya ka la paw kum ka jylla ba jur bha ka bamsap hynrei haduh ka jingwan iuh kjat u Modi ka Meghalaya ka la paw kum ka jylla ba ban bud nuksa haka roi ka par” la ong u Jitendra.