Kiba ong ba ka TMC ka dei ka party dkhar ka pyni ïa ka jinglyngkot jingmut: Edmund Khongngai

0

Shillong, Rymphang 06: U kyrtong ka AITC na Pynursla Constituency u Bah Edmund Khongngai u la ong ba ka jingmih ka jingkynnoh ba ka AITC ka dei ka party dkhar ne ka party Bengali ka pyni ïa ka jinglyngkot jingmut jong ki nongkren namar kane ka party kam dei kaba la seng tang ban shakri ïa ki paidbah ka West Bengalhynrei ïa ki paidlang ha kylleng ka ri India.
Haba kren sha ki lad pathai khubor, u Bah Edmund u ong ba ka jingjied jong u ban ïakhun na kane ka party ka dei namar u ïohi ka don ka thong kaba shai bad ka jingïohi jngai kaba beit na bynta ban kyntiew ïa ki samla ka jylla bad ïa ki nongshong shnong hi baroh.
“Nga jied ïa ka TMC namar ka dei ka party kaba khlaiñ kaban kren lang na bynta ka jaidbynriew ym kum ka NPP kaba shukor ïa ngi da kaba kyrshan ïa ka CAB ban long aiñ, nga jied namar ka don ka thong na bynta ban kyntiew ïa ka jylla bad ki nongshong shnong jong ka bad nga jied namar ka dei ka party ban kren na bynta u duk u suk,” u la ong.
Haba kylli la ka jingïasoh jong u sha ka AITC u don aiu ban ong kum u nongïalam barim ka HYC halor ka jingbym ïohrung ka ILP ha ka kular elekshon ka party, “Ngim kwah ban pynlong ishu elekshon ïa kane ka mat hynrei nga kwah ban kren da kaba shai ngan dei uaba nyngkong tam ban rah ïa kane ka mat bad kum ka party ngi kloi ban tied meij wat ha Parliament ban pynlong aiñ ïa ka ILP ha ka jylla,” u la ong.
Haba kylli haduh katno u don ka jingsngew skehm ba un lah ban pynleim ïa u Bah Prestone, “Nga dei u briew uba thymmai bad na ka party ruh kaba thymmai hynrei ngi dei ban sngewthuh ba nga ga don tang shivote bad ngam lah ban pynjop da lade ïa lade hynrei dei u paidbah hi ban rai bad nga sngew skhem hadien ba nga la iuh kjat lut ha ki shnong baroh ba kawei ka sur ka la mih ba ki paidbah ka thaiñ ki la kwah ïa ka jingkylla bad ka jingkylla ruh sha kaba kham bha,” u la ong.

Leave A Reply

Your email address will not be published.