Shillong, Rymphang 06 : U kyrtong ka UDP na Nongthymmai, Dr. Jemino Mawthoh u la ong ba wat ha ka sorkar ba thymmai kaban sa wan ruh yn ym don ki party kiba lah ban thaw sorkar khlem ka jingsynrop lang bad ka party UDP.
Haba kren bad ki lad pathai khubor hadien ba la dep ban thep kyrteng ha kane ka sngi Nyngkong, u Dr. Jemino uba dei ruh u General Secretary ka UDP u la ong, “Yn ym don ba lah ban thawe sorkar hadien ka elekshon khlem ka UDP.”
Nalorkata, u la ong ruh ba lada phai dien ha ka elekshon ba la dep ki jop tang hynriew ngut ki MLA hynrei ki ïoh pat ïa ka bynta kaba khraw bha ban donlang ha ka sorkar bad ban pynskhem ïa ka.
Kum u MLA barim jong ka thaiñ, u Dr. Jemino u pynpaw ruh ka jingkyrmen ba ha kane ka elekshon MLA ka party kan ïoh ban jop kham bun ki MLA bad ïoh ruh ban ïalam ïa ka sorkar.
Kiwei pat kiba thep kyrteng na ka UDP ha kane ka sngi ki kynthup ïa u Bah Remington Pyngrope kyrtong ka UDP na Mawkynrew, Bah Mitchel Wankhar na Mylliem bad Bah Lambor Malngiang na Nongkrem.
