Thep kyrteng u bah Vincent.H.Pala na ka party congress ban ïakhun na ka 5-Sutnga Saipung Constituency

0

Khliehriat Rymphang 06 : U bah Vincent.H.Pala, uba dei ruh u MP jong ka Rajysabha, uba dei ruh u nongïalam ba radbah jong ka party Congress hapoh ka jylla, mynta ka sngi, u la wan ban thep kyrteng (nomination) ha u Returning Officer ha ophis u Deputy Commissioner ha Khliehriat bad un ïakhun ïa ka Meghalaya Legislative Assembly Election na ka 5-Sutnga Saipung Constituency, na ka party Congress.
Haba kren sha ki pathai khubor, u bah V. H.Pala, u la ong ba, “ Ka jingkwah jong nga ban ïaleh ïa kane ka election mynta ka dei namar ba nga iohi ïa ka jingduk jing jynjar ki briew kiba hapoh kane ka constituency bad ki kam, ki jam ruh ki la shu shah knieh noh, la ka dei ha u dewiong ne ha u maw shun, kumjuh ruh ki nongrep, na kata ka daw ka pynpyrkhat ïa nga ba ngan phai sha ki paidbah, ki paradoh para snam lada ki ailad ba ngan wan, ba ngan dup ioh ka lad ban sahkri ïa ki paidbah,” u la ong ruh ba ynda u wan ha ka bor, un peit bad iarap ïa kito kiba duk kiba donkam shisha ïa ka jingiarap, haba kren shaphang ki lad iohkam iohjam, utei u kyrtong u la ong ba “ngi hapoh ka congress ngi la pyrkhat ïa ka iohkam iohjam jong ki briew, kumba long mynta ka jingdonkam bor ding electric hapoh Meghalaya ka long haduh 650MW, hynrei ngi don tang 350 MW, dang donkam shuh sa 300MW kaba ngi khlem lah ban pynbiang, na kata ka daw ngi buh thong ban shna bun tylli ki dam, ngi buh thong haduh 500 MW, ngin shna ki project bad hangne da ki hajar ngut ki khynnah samla ki ban ïohkam ïoh jam, ngin wahrah ruh ïa ki karkhana, ym dei pat kum kito ki karkhana kiba pynjakhlia, kum kine ki coke kumba ngi ïohi, lada buh coke ruh dei ban don ki technology kiba bha kiba lah ban pynkhuid, ki ban nym ktah ïa ka koit ka khiah, ka iohkam iohjam ka shong ha ki investment, ngin khot ïa ki call centre , ngin shna ïa ki karkhana kiba rit ba rit ruh kum kiba na ka bynta kiba rep u synsar, kiba rep soh, Kum ka District Council, ha ka jingshisha kaba lah ban ai kam da ki hajar ki briew, hynrei namar ba la jied ïa ki nongmihkhmat, ki MDC ki bym ler, ym dei ba nga kynnoh”
Kawei ruh kaba u la pynpaw, u la ong ba “Lada nga wan ha ka bor, kaba nyngkong eh ka dei ba pynduh ïa kane ka bamsap, kane ka jingkhrong na kiba duk, ka jingkhrong na kiba trei dewïong, ka jingkhrong na ki ba trei mawshun, na ki nongrep, ka don ruh kane ka High Lvel, kumta lada ngi wan ha ka bor ngi dei ban peit, namar ba kane baroh ka dei ka jinglute na ki padibah”.
U la pynpaw ruh ka jingsngew skhem ba da ka jingshaniah jong ki paidbah un jop bad un poi sha ka thong, da kaba ong ruh ba ki nongthep vote jong ka Sutnga-Saipung Constituency, ki dei kiba stad.

Leave A Reply

Your email address will not be published.