Shillong, Naiwieng 23 : Ka Germany ka la mad nam rem ha kaba sdang ka jingïaid lynti jong ka ha ka FIFA World Cup ha Qatar da 1-2 kol ha ka Japan ha ka jingïalehkai hynne ka sngi Balang ha Khalifa International Stadium, katba ka France ka la khur nam jop da kaba pynliem da 4-1 kol ïa ka Australia ha ka jingïalehkai na ka Group D ha Al Janoub Stadium.
Haba phai sha ka jingïalehkai hapdeng ka Germany na ka Group E, ka Germany naduh kaba sdang ka la ñion sha ka kut jong ka Japan hynrei ka khlem lah ban pyndep thep kol bad dei tad haduh ka minit ba 33 ka la ïoh ban plie pyrda lyngba ka penalty ïa kaba la thep da u Ikay Gundogan bad lamkhmat da 1-0 ha kaba kut ka kylla step.
Hynrei dei ha ka kylla miet, ka Japan ka la ïoh ban pynphai kylla ïa katei ka shi kol ba la thep nyngkong da u Ritsu Doan ha ka minit ïalehkai ba 75 bad ha ka minit ba 83 u Takuma Asano u la thep ïa ka kol kaba ar na bynta ka Japan kaba la lah ban kyrda na ka jingshah thep kol haduh kaba kut jong ka jingïalehkai bad khur syndon ïa ka jingjop.
Ha ka jingïalehkai hapdeng ka France bad Australia, dei ka Australia kaba la thep kol nyngkong ha ka jingïalehkai ba dang ïaid 9 minit ba la thep da u Craig Goodwin, hynrei ka France ka la siew kylliang lyngba u Adrien Rabiot ha ka minit ba 27.
U Oliver Giroud u la thep ar kol ha kane ka sngi sdang kata ha ka minit ba 32 bad 71 katba u Kylian Mbappe u la thep shi kol ha ka minit ïalehkai ba 68.
