Shillong, Naiwieng 23 : Ka Meghalaya ka la pynkut ka jingïaid lynti jong ka ha ka lympung ïalehkai Vijay Hazare Trophy one day tournament da kaba khur jingjop pyrshah ïa ka Sikkim da kaba pynliem da 59 ron ha ka jingïalehkai hynne ka sngi Balang ha Kolkata. Katei ka nam jop ka la wan lyngba ka jinglah ban ïalehkai bha u Sylvester Mylliempdah ha ka liang ka tied bad kawang bol.
Ka Meghalaya ka la ïakhun pyrshah ïa ki team kiba khlaiñ mynta u snem na ka Group B da kaba mad nam rem lait noh tang ka jingjop pyrshah ïa ka Sikkim. Hynne ka sngi ka Meghalaya ka la jop ïa ka jingkynting pisa ha Eden Gardens bad kam ban tied nyngkong, da kaba kamai 226 bad duh noh 9 wicket ha baroh ki 50 over shwa ba kan pynhap lut baroh ki wicket jong ka Sikkim kaba kamai tang 167 ron.
Watla ka la don haduh lai ngut ki rangïalehkai guest professionals, hynrei dei ki nongïalehkai kiba napoh la ka jong ka jylla (Meghalaya) kidei kiba la tyngshaiñ ha kane ka jingïalehkai.
U Sylvester Mylliempdah uba la tied sdang u kamai 49 ron da kaba khyrwit san tylli ki four hynrei u khlem kynjoh sha ka half-century.
U Lerry Sangma u tied 45 ron na ki 47 ron da kaba khyrwit saw tylli ki four bad kawei ka six. U Yogesh Tiwari (27) bad u Junjun Sangma (18) ki la ïarap kamai ron na bynta ka Meghalaya ha kaba u Junjun Sangma la ïoh ban mih madan tang arsien ha kane ka lympung.
Uwei pat u rangtied uba la ïarap na bynta ka kynhun u dei u Abhishek Kumar, uba la khyrwit 27 ron ha ki ar over kiba khatduh ha kaba u la kynjoh sha ka 32 ron na ki 15 bol khlem da hap wicket bad tied kawei ka four bad ar tylli ki six.
Ki hynriew ngut ki rangkawang bol ka Meghalaya kiba la shim ka bynta, ki la khur mar shi wicket lait noh tang u Mylliempdah uba la khur 3 wicket ai kamai 37 ron, katba u Kumar u ïoh 2 wicket ai kamai 21 ron, u Dippu Ch Sangma 2/33. U Chengkam Sangma u ïoh 1 wicket ai kamai 6 ron katba u Rajesh Bishnoi (1/33) bad u Chirag Khurana (1/35).
Ka kynhun ïalehkai kriket ki senior ka Meghalaya mynta kin pynkhreh pat na bynta ban ïalehkai ïa ka Ranji Trophy, kaban sdang ha u bnai Nohprah.
