K a jingshah siat ïap jong ki san ngut ki riewpaidbah baluilui ha ki ktang suloi jong ki Pulit ka Sorkar Assam bad ki Pulit pahara khlaw ka la pynbitar haduh katta katta ïa ki paidbah nongshong shnong jong ka jylla Meghalaya. Kane ka jingjia ka la pur kum ka ding ha u langïap. Ka Sorkar Meghalaya ka la pyrshang ban tem ïa ka jingklang jong ka ding da kaba pynsangeh lut ïa baroh ki jingleh sngewbha bad ki tamasa kiba la dei ban pynlong ha une u Naiwieng. Ym tang katta, mardor u Myntri Rangbah ka Jylla u Conrad Kongkal Sangma u la pynbna ba ka Sorkar Jylla kan siew bailutksan mar T.5 lak sha ki longing jong ki san ngut ki lanot kiba la duhei ïa la ka jingim ha ka jingshah synreit kuli ha ka step jong ka 22 tarik, Naiwieng, 2022.
Lah ban ong, ba kane ka jingjia ha ka shnong Mukroh kan nang pynklang shuh shuh ïa ka ding kaba la rhem lypa na ka jingïajia pud hapdeng ka jylla Meghalaya bad ka Jylla Assam kaba la neh mynta la jan san phew snem.
Kane ka jingjia, ka la pynkynmaw biang ïa ki paidbah nongshong shnong ka jylla Meghalaya ïa ka jingshah synreit kuli saw ngut ki rangbah Khasi ha ka shnong Langpih ha u bnai Jymmang, 2010 ha ki Pulit ka Jylla Assam.
Kine ki dang dei tang ki ar tylli ki jingjia ba ki paidbah ki kynmaw kyndiang ïa ki jingsynreit kuli jong ki Pulit Assam ïa ki paidbah nongshong shnong ka jylla Meghalaya hynrei ki bun bha ki jingjia kiba la jia ha ki snem kiba ladep ha kaba ki Pulit ka Jylla Assam ki la thombor ïa ki paidbah kiba shong basah ha ki shnong kiba don ha khappud ka jylla Meghalaya bad ka Jylla Assam.
Kine ki jingjia ki long ka daw na ki sohkyrdot ka jingïakajia pud hapdeng ka Jylla Meghalaya bad ka jylla Assam. Ki briew kiba sah ha ki shnong khappud ki ïakynduh mawsiang bha namarba ka Status Quo kaba ïasoi ki snem ba la leit noh hapdeng ka Sorkar Meghalaya bad ka Sorkar Assam ka long pynban ban ailad ïa ka Assam ban kyntur pud bad ka Meghalaya kan nang shah khñiot na baroh ki liang.
Ki paidbah kiba shong basah ha ki bynta khappud ki sngewthuh shai ba ka Jylla Meghalaya kam pat ïoh ïa ka Jylla bapura namarba ki ïai shah pyndik laiphewjait ha ka Sorkar Assam namarba kam burom satia ïa ka Status Quo ba la ïasoi bad ka Sorkar Meghalaya. Ka jingshah jem bad ka jingaimon ka Sorkar Meghalaya ka pynlong ïa ka Sorkar Assam ban phah pyntieng pynsmiej da ki shipai ki swar ban pynkbum da ki ktang suloi khnang ba ki paidbah Khasi kiba shong ha ki shnong khappud kin kohnguh bad kin pyndem hakhmat ka Sorkar Assam.
Lada phai sha Block-I bad Block-II, ki shnong kiba ïatakhuh bad ka Jylla Assam ki mad ïa kajuh ka jingshah pyndik namar ki paid Khasi Pnar ki la mad teng ïa ka jingkylla phetwir ha la ka jong ka ri tang namarba ki sheptieng ïa ki ktang suloi jong ki Pulit Assam kiba pyntieng pynsmiej ïa ki paidbah thik kum ki lehnoh.
Kum kine ki jingeh, ka Sorkar Pdeng ka ladei ban tuklar mardor bad ka ladei ban phah ïa ki ksiang nongpynïasuk ban pynkut noh ïa kine ki jingïakynad kiba pynpoi wat shaduh u pud ba ki nongshong shnong ki hap ban theh ïa la ka jong ka snam tang ban ïada ïa la ka iing ka sem bad ka jaka ka puta namarba ka jingïakren ïapynbeit pud ka shu long tang ha suiñ katba ka Sorkar Assam kam burom satia ïa ki jingïakut bad ki jingïakren hapdeng ki arliang mamla.
Mynta ka shong eh ha ka mon bajwat jong ka Sorkar Meghalaya Democratic Alliance (MDA) hapoh ka jingïalam jong u Conrad Kongkal Sangma, kum u Myntri Rangbah ban pynkut noh ïa kine ki kynrum kynram hynrei ym ban pynlong ishu elekshon ïa ka jingeh jong ki paidbah ka jylla.
