K ane ka dei ka samoi kaba ki khun bynriew ha kane ka jylla ki sngewtynnad bha ban leit bam khana bad leit sngewbha sha lum sha wah kumta kane ka samoi ka pynkynmaw ïa phi bad ïa nga kumno ba ngi dei ban ïada ïa ka mariang ym ban thang ïa ki khlaw ki btap, ym ban bret pathar ïa ki plastic, ki bilor ne ki jakhlia jakhlait namar ki dei kine kiba pyntroiñ ïa ka mariang.
Ban ïada ïa ka mariang ka long da shisha kaba u briew u da thrang bad angnud palat namar u tip shai ba lada ym don shuh ma ka kane ka snieh jong ka pyrthei kaba ïa im ïa sah ïa long ïa man hapdeng ki para jingthaw U BLei kin duh jait noh shi syndon naka. Ki dak ki shin ka jingduh jait kine ki la sdang ba kin wan ba kin mih ha ka dur ka jingkylla ka jinglong jingman ha ka liang ka suiñ bneng, ka jingjah noh ki sim ki doh, ki mrad ki mreng ki dieng ki siej ki phlang ki kynbat bad ki dohkha ki dohpnat ki pynsmiej ïaka jingim u bynriew ha kane ka sla jong ka pyrthei.
Dei kumta, u bynriew u sngewthuh ba lymda lah shisha ban ïeng kloi ban ïada ïala ka mariang, ki sngi kim slem shuh ba kiei kiei kiba don ha kane ka sla jong ka pyrthei kin sa duh sa dam, bad ha ki akher jong ka sngi, ma u hi marwei un kylla rangli, un ïam pangnud, namar ka mynsiem ba rhah ba shu kwah ïa la ka spah bym hok ka bym kdang shuh, hynrei la shu mait naphang lin, la tih la sam da ki nam sarang, mynta ka la sang pat ba kan sloit ïaka jingitynnad ïaka dur ka dar jong ka mariang.
Ki jingkylla ki hap ba kin ïaid kat kum ka juk kaba ngi ïa im ïa long ïa man, hynrei hapdeng ki jingkylla, dang lah pat ban pynneh ïaka mariang, lada u bynriew u sngewthuh shisha ïaka dor bad ka jingsngew donkam ban lah ban pynneh ïaka. Pynban, hapdeng ka jingïaknieh ban ïoh pat ban kamai ïaka spah ka hajar bad ka sngewbha pyrthei, u bynriew u klet pat ba un shim ia ki lad da kumno ba un im un shong bad un sah ryngkat bad la ka jong ka mariang.
Ha ki sawdong ki sawkun kaba u bynriew u im u shong bad u sah u sdang lynga bad pisa ka mynsiem, namar lada u ïaleh ban kham tyngkai ïaka mariang, da lei lei un nym lah ban kynjoh sha kata ka thong ba un kamai sted ïa la ka spah ka phew, namar ïa u la sur matlah satang ka jingiapbiej ïaka spah kba katba u nang ïoh kata u dang kah shuh, ha kaba lano lano kam lah satia ban poi ha ka khep kaba u bynriew un ong ba kato u la dap u la biang, hynrei ba un phai la ki khmat ban ïada ïaka mariang.
Kaei kaba ïa shem bad ïohi mynta ka long ba u bynriew u im ïalade ha ka khep kaba um nang shuh ba un rai, la un pynneh ïaka mariang ne ban ïaleh ban sloit lut ïaka, namar khlieh la ka sngi, kata ka jingdonkam ha ka jingim ka jong u ha kane ka snieh jong ka pyrthei ka ïai kylla dur, ha kaba ka mynsiem ka jong u kam hun ïa kaei kaba u la dep ba un ïoh, pynban ka rhah beit ba un im lem ka jingim kaba ïai kylla rong.
Hynrei don pat ki khep haba u shongkai hala marwei, haba u phai pat sha ka mariang, u ïohsngew ïaka sur ba kynud ïam briew kaba sngew shyrkhei, hangne u sdang pat ba un kyndit bynriew, u kyndeh pat ka mynsiem, u tieng u syier ba ki akher jong ka sngi kine ki la sdang ban ïai wan ban mihpaw, katno tam lei lei haba ki bor ka mariang ki sdang ba ki kawut bad sympat da la ka jong ka bor ka jong ki, ba u bynriew ha kum kane ka khep, u sdang ruh pat wat ban kynmmaw ïa U Blei Nongbuh Nongthaw.
Pynban ha u bynriew u ba da ïeit shisha ïaka mariang, u da don ha u ïa ki kyntien sbai ki kyntien rupa ba un shna pynwan dur ha ki sur jong ka jingrwai ne ha ka poitri, u da kyntu lem ïa u para bynriew ba keiñ noh ka rhah ïaka spah kamai, hynrei ban hun noh pat ka mynsiem ïa kaei kaba u Blei Trai Kynrad u la sam bad u la dep ba un buh pat ïala ka bynta, katno tam lei lei haba la don lypa ka kynja jingkyrkhu kaba kyrpang haka jingim, ha kaba la lait na thngan ka jingit, la lait naka shah slap ka shah sngi, la lait na ka khrong, namar baka mariang ïa u bynriew ka la lah ba kan pynap ba kan pynbiang ïa baroh ki jingdonkam u bynriew.
Kumta ai ba une u bnai ter ter shakhmat ba u bynriew un ïeng ban kyndit naka bynta ban klet noh shi syndon ïaka spah kamai bym hok, ban rung noh ha u ïaka kynja mynsiem kaba kaei kaba u Blei u la kyrkhu u la kyrdoh ban hun bad ban pdiang noh haka jingim. Lada u bynriew u lah shisha ban im biang sa shisien ryngkat bad la ka mariang, ka jingkykhu khlem pep kan wan hi ha ka jingim ka jong u, kaba sa shisien un sa ïoh pat ba un mad ïaka jingim kaba dap kaba shlei kaba kmen, kaba um donkam ba un khuslai eiei.
