Mawkyrwat, ‘Naiwieng, 23: Kum ka dak jong ka jingaimynsiem ha ryngkat ka jingpynshlur na ka bynta ki khynnah skul kiba na ka Hima Maharam Syiemship kiba la wan shakhmat ha ki jingïaleh eksam, na ka liang kiba ha ïing ha sem jong u Parad Maniwell Jahrin (bam kwai ha dwai U Blei) mynta ka sngi ki la ïoh ban pynlong ïa ka prokram pynkup burom da ka “Maniwell Jahrin Excellence Award 2022” ïa ki 5 ngut ki khynnah pule kiba la wan shakhmat ha ka eksam SSLC jong u snem 2022.
Ïa katei ka jingïalang ha kane ka sngi la pynlong ha Multipurpose Hall jong ka ophis Deputy Commis-sioner, South West Khasi Hills District, Mawkyrwat ha kaba u Thomas A. Sangma uba long u nongaibuit jong u Myntri Rangbah ka Jylla Meghalaya u la long kum u kongsan ha ryngkat ka jingïadonlang ka kong C. Kharkongngor, IAS, Deputy Commissioner, South West Khasi Hills District bad kiwei de kiba la shah khot sngewbha naduh ki nonghikai bad kumjuh ruh ki khynnah skul.
Lah ban kdew ba ki 5 ngut kiba la ïoh pdiang ïa ka khusnam “Maniwell Jahrin Excellence Award 2022” ki kynthup ïa u Damebanhun Thongni uba la ïoh 83.33% uba pule ha Nativity Higher Secondary School, Mawkyrwat, ka Naphisha Dkhar kaba la ïoh 80.33%, ka Ilawanshwa Nongsiej kaba la ïoh 79.50%, ka Eureca Kharwanniang kaba la ïoh 78%, bad ka Dahunshisha Lyngkhoi kaba la ïoh 75% bad kine baroh ki dei kiba la leh bha ha ka eksam jong ka Class X ne ka Secondary School Leaving Certificate (SSLC) jong u snem 2022.
Haba kren kum u kongsan u Thomas A. Sangma u la ong ba kum ki khynnah skul haba ki leh ïa kano kano kam ki dei ban buh nyngkong ïa U Blei shakhmat namar dei ma U U ksiang ha ka jingim jong ngi ki briew. “La phi stad katno katno ruh khlem ka jingïarap jong U Blei na jrong bunsien ki jingthmu ki long leh noh ei”, u Thomas. Namarkata, u la ai mynsiem ïa ki khynnah skul kiba dang don hapdeng jong ka jingpule ba kim dei ban pynleh noh ei ïa ka por hynrei ki dei ban minot thop ha ki jingpule, trei shitom bad shaniah ha U Blei U ban pynïaid ïa ka jingim jong ki.
Haba kren ai mynsiem na ka bynta ki 5 ngut kiba la ïoh pdiang ïa ka khusnam ba haba ki ïoh ïa kane ka khusnam kim dei ban hun tang hangne hynrei ki dei ban pyrkhat ruh kham ha jngai khnang ba ki jingthmu ha ka jingim jong ki kan long kaba phyrnai.
Ka kong C. Kharkongngor, IAS, Deputy Commissioner, South West Khasi Hills District ha ka jingkren jong ka ka la ong ba kane ka long ka sngi kaba khraw ha kaba ki khynnah pule jong kane ka thaiñ kin ïoh ban shah pynkup burom ha kane ka sngi ban sah kynmaw ïa u Parad Maniwell Jahrin (bam kwai ha dwai U Blei). Ka ngeit ruh ba haba ki khynnah ki ïoh ïa kane ka jingshah pynkup burom kin nang ban pyndonkam hok ïa ka na ka bynta kaei kaei kaba bha ka ban lah ban rah bad kyntiew ïa ki shajrong. Ka la ong ruh ba ki khynnah mynta ki long kiba donbok, namar ki don bun ki lad ki lynti bad ka shong ha ki kumno ban jied bad ban pyndep hok ïa ki jingpule.
Namarkata, ka la kyntu ïa ki ba kin trei minot bad ban pyndep hok ïa ki kamram khnang ba kin lah ban long ka jingmyntoi ïa ka imlang sahlang hadien habud bad ban pyndonkam hok ïa ka pisa kaba ki ïoh kum ka khusnam nongjop. Ha kajuh ka por ka la pynpaw ïa ka jingsngewnguh ïa ka Kur Jahrin kaba la pynlong kum ïa kane ka prokram ha ka ban ai mynsiem bad kyntiew ïa ki samla pule jong ka Hima Maharam baroh kawei.
Ïa ka Testimony sha-phang ka jingim jong u Parad Maniwell Jahrin (bam kwai ha dwai U Blei) la pule da ka kong Pearly Syiem Marak kaba long ruh ka nongpynïaid ïa ka jingïalang bad ka jingpule na ka Ktien U Blei, ka jingdwai na ka kong Rosamund Syiem, ka jingdwai kyrkhu na ka bynta ki jingïoh ïa ka khusnam na u Timothy C.G. Monin.
