Da ki lama ïong teh ki ar seng ha ki kali bad ha kiwei de ki jaka hapoh jong ka South West KHD

Mawkyrwat, ‘Naiwieng 23: Kum ka dak jong ka jingsngewlem bad sngewkhia halor ka jingshah pynïap dusmon jong ki mynsiem ba kordor ha kawei ka jaka ba marpud bad ka Assam ka shnong Mukroh, West Jaiñtia Hills District mynta ki ar seng ba kynthup ïa ka Federation of Khasi Jaiñtia & Garo People (FKJGP) bad ka Khasi Student’s Union (KSU) jong ka South West Khasi Hills District bad Mawkyrwat Circle ki la ïoh ban teh ïa ki lama ïong ha ki kali bad kumjuh ruh ha ki ophis Sorkar ha South West Khasi Hills District.
Hadien ba jingteh ïa ki lama ïong, u bah Balse Kharbani, Secretary ka FKJGP South West Khasi Hills District haba kren ha ki lad pathai khubor u la ong ba ka jingwan mih paidbah jong ki dkhot ka seng mynta ka sngi ha ki katto katne ki jaka ïew ka long ban teh ki lama ha ki kali kaba long kum ka dak jong ka jingsngewlem bad pynpaw ka jingsngewkhia halor ka jingshah shim jubor ki mynsiem briew ha kawei na ki shnong ha Mukroh kaba markhap bad ka Assam ha ka jingjia ha ka 22 tarik mynta u bnai.
Namarkata, u la ong ba kane ka jingleh donbor jong ki Pulit Assam ka pyn-i shai ba ki nongïalam jong ka Sorkar Meghalaya ki tlot bor haduh katta katta namar da ka jingbym kheiñ snep shuh jong ki (pulit Assam) ïa ka sorkar Meghalaya ha kaba kine ki pulit ki la wan ban siat ïa ki briew jong ka Meghalaya bad kane ka long kaei kaei ka bym sngewïap ba kum ka seng FKJGP ka sngew ban pynrem jur ïa ki pulit kiba la leh ïa kane ka kam bad ka pynrem ruh ïa ka sorkar Assam namar lada khlem da ïoh jingbit na ki bor kiba ha jrong kumno kin nud ban shu leh lyndet ïa kane ka kam.
U bah Balse u la ong ruh ba kaba i thamula ka long ba ynda la duh 5 ki mynsiem briew ha katei ka jaka ka sorkar Meghalaya ka sa pei shkor ban buh ïa ka Out Post Police Station. Namarkata, ka seng lyngba kane ka phah ki khubor sha ka Sorkar Meghalaya bad ka Sorkar Assam ba lada ki la don jingthmu ban phah tohkit halor kane jingjia ha ka National Investigation Agency (NIA) ne ka Central Bureau of Investigation (CBI) bad lada kata ka jingtohkit kam ai jinghun ïa ki paidbah jong ka Jylla baroh kawei, kum ka FKJGP ka kren da kaba shai ba ki don shibun ki bar jylla kiba don ha kine ki dong ki thaiñ bad kan sa pynlong da kawei pat ka jingïalang ban ïatai bad shim ka rai ban ai syndon da ka ‘Quit Notice’ ïa ki bar jylla kiba don ha kane ka dong ka thaiñ.
Katba ha ka jingkren jong u bah Pauldeep Tongwah, President ka KSU Mawkyrwat Circle u la ong ba ka KSU Mawkyrwat Circle ryngkat ka KSU South West Khasi Hills District da ka jingsngewkhia haba la ïohi ïa ka jingshah bthat jubor jong ki 5 ngut ki mynsiem ba kordor ha ki pulit ka Assam, kum ka seng ka phah khubor ban pynrem jur ïa kane ka jingleh ‘riew khlaw jong ki. “Kum ka dak jong ka jingpyrshah halor kane ka kam, ka seng KSU ka la ïoh ban teh ki lama ïong ha ki kali bad kiwei de ki jaka”, ong u Pauldeep.
Ki phah ruh ka jingpynrem ïa ka sorkar Meghalaya kaba hapoh ka jingïalam jong u Conrad Sangma kum u Myntri Rangbah ka Jylla ïa ka jingtlot ha ki rukom treikam kaba la pynlong haduh ban poi ha u pud ba ki para doh para snam kin duh ïa la ka jong ka jingim bad kum kine ki jingjia ym dei tang mynta hynrei ha kiba bun ki khep la ju ïohi ïa kiba kum kine ki jingjia bad ka jingbymler kam jong kane ka sorkar.
“Lada ka jia shi ïai jia kumne, ka por ka la dei ba kum ki samla kin mih shakhmat ha kaba kum ka dong ka thaiñ kan hap ban kynther ïa ki bar jylla kiba don ha kylleng ki jaka kiba rieng tngen bad kiba sngewheh mynsiem haba ki ïohi ïa ka jingtlot jong ki bor synshar jong ka Sorkar Meghalaya”, ong u bah Pauldeep bad ong ruh ba kum ka seng kan nym shongkli-kti hynrei kan tur naphang ban nym ai lad shuh ïa ki nongwei nongar ba kin wan rung bad leh trai khlieh ha kine ki jaka jong ngi. “Ngin ïai long ki shipai ban pynthikna ba ka dong ka thaiñ kan lait na ki jaboh jabaiñ ba ngin hap ban kynther ïa ka jingdon ki nongwei shisngi”, ong u bah Pauldeep.
Namarkata, na ka liang ki ar seng ka FKJGP, South West Khasi Hills District ryngkat ka KSU, South West Khasi Hills District bad ka KSU Mawkyrwat Circle ki phah ka kyrwoh sngewlem sha baroh kiba ha ïing ha sem kiba ïa kynduh ïa kane ka jingjia ba sngewsih ba to U Blei Un don ryngkat lem bad ki ha ki por baroh.
Ka jingteh lama ïong jong ka FKJGP ka long ha baroh ki kali kiba don ha ki jaka Ïew jong South West Khasi Hills District ba kynthup naduh ka Ïew Mawkyrwat, Ïew Borsora, Ïew Photkroh bad Ïew Nongjri bad kiwei de.
Ïa ka kynhun jong ka FKJGP la ïalamkhmat da u bah D.K. Lyngdoh Nonglait, President bad u bah Balse Kharbani, Secretary jong ka FKJGP South West Khasi Hills District katba ka kynhun jong ka KSU pat la lam khmat da u Pauldeep Tongwah, President ka KSU Mawkyrwat Circle ryngkat ka jingsynrang lang da ki dkhot jong ka seng.