Ka jingsiew bailutksan 5 lak ka paw ba ka Sorkar Assam kam kheiñ snep eiei ïa ka Sorkar Meghalaya

Pyndait lama ïong ki lai seng ha ki kali ka WKH

0

Nongstoiñ, Naiwieng, 23: Kisengbhalang ka West Khasi Hills ba kynthup ïa ka FKJGP, KSU bad ka HNYF, kum ka dak jong ka jingpynrem bad ka jingsngew lem ïa ka jingshah siat ïap jong ki hynriew ngut ki briew ha Mukroh, ki la pynlong da ka black flag day ha kaba ki la sieh da ki lama ïong ha kylleng ki jaka jong ka District bad ruh ha ki kali ba kynthup naduh ki kali kamai bad ki kali shimet. Nalor kata ki la leit ban sieh da ki lama ïong ha baroh ki ophis sorkar.
Ki nongïalam jong kitei ki lai tylli ki sengbhalang haba ïakren bad ki nongthoh khubor, ki la ong ba katei ka jingjia ka dei ka jingjia kaba la pynsngewsih jur ym tang ïa ki longïing jong kito kiba ngat ha katei ka apot sepsngi, hynrei ka pynsngewsih kthang ruh ïa ki para doh para snam ha ka bri u Hynñiewtrep baroh kawei.
U bah Carry Oscar Kharmuti general secretary ka FKJGP, u la ong ba ka jingjia ha Mukroh kam dei shuh ka jingjia kaba dang thymmai, namar kaba kum kane ka jingjia ka la jia ha u snem 2010 ha Langpih ha kaba saw ngut ki rangbah Khasi, ki la shah siat ïap ha ki pulit Assam. Ha kajuh ka por u la ong ba kumba ki tip ba hadien ka jingshah siat ïap ha Mukroh, ka sorkar ka la pynkhlaiñ ïa ki bor pahara ha Shillong ha ka jaka ban phah pahara sha khappud.
Nalor kata u la ong ba man ka por lada don ki jingïaid rally jong ki sengbhalang ban dawa ïa ka hok, ka sorkar ka phah da ki bor pulit ban khanglad. U la ong ruh ba ka jingkular jong ka sorkar Assam ban siew san lak tyngka sha ki longïing kiba ngat ha katei ka apot, ka pyni shai ba ka sorkar Assam kam kheiñ snep satia ïa ki briew jong ka Meghalaya.
U la bynrap ruh ba lada ïa ka jingim briew la pynshongdor tang san lak tyngka ka long kaei kaei ka bym sngewïahap. Kitei ki nongïalam jong ki sengbhalang ki la dawa ruh na ka sorkar ba ka dei ban phah shuh shuh ki bor pulit sha katei ka jaka ban ïada ïa ki paitbah.

Leave A Reply

Your email address will not be published.