La dep rai kut ki 69 shnong ka Langpih Sector ban ym leit daleilei sha Jylla Assam: Dominic Wahlang

Nongstoiñ, Naiwieng, 23: Ka jingpynbna jong u bah Renikton Lyngdoh Tongkhar, Chairman jong ka Regional Committee on Border Dispute ba dei peit ïa ka West Khasi Hills, ba shen un sa khot ïa ki nongsynshar shnong bad hima ban ïaphylliew jingmut ha shuwa ban leit jurip ïa ki shong ki thaw bad ki jaka kiba hap ha ka Langpih sector, na ka bynta ban sdang pynbeit noh ïa u pud u sam, ka la sdang ban pynïoh mynsiem ïa ki paitbah.
Halor kane u bah Dominic Wahlang uwei na ki riew rangbah jong ka Langpih, haba ïakren bad u nongthoh khubor, u la ïathuh ba ki paitbah jong kitei ki hynriewphew khyndai tylli ki shnong ba kynthup ïa ki shnong Khasi bad Garo, ha kine ki sngi ki la sdang ban ïoh mynsiem bad ki la sdang ban sngew shngaiñ haba ki shong ki sah ha kitei ki jaka kiba dang don hapdeng jong ka jingbym pat lah ban ïapynbeit.
U la ong ba na ka liang u Syiem ka hima Nongmynsaw u la register ïa ki jaka bad ki nongrim ïing jong kiba ki la shnong la sah. U la ïathuh ruh ba na ka liang ki paralok Garo jong ki shnong bapher bapher, mynta ki la rai kut ba kin ym leit sha Assam da lei lei ruh hynrei kin sah beit ha Meghalaya.
U la ïathuh ruh ba ka daw kaba pynlong ïa ki paitbah Garo kiba shong ha kitei ki shnong khappud, ba kin rai kut ban sah ha Meghalaya, ka dei hadien ba ki la don ki briew jong ka sorkar Assam, kiba la wan pyntip sha ki, ba ka sorkar Assam kan ai tang lai bikha ka jaka ïa kawei kawei ka longïing, hynrei ki kper ki phrah bad ki jaka ba lait baroh ki dcei ki jaka jong ka sorkar.
U la ong ruh ba dei halor katei ka nongrim ba ki paitbah garo ha kine ki sngi, ki la sdang ban khih khohreh bad pyneh triang ba kin ym leit sha Assam da lei lei ruh. Lada ki ar sorkar kim sngap ïa ka jingkwah jong ki, ki jingeh kiba bun ki lah ban mih hadien habud.
Ki tyllong khubor kiba la ïoh lum na ki paitbah jong ki shnong kiba hap ha ka Langpih sector, ki ong ba baroh ki nongshong shnong hapoh katei ka sector, ki dawa ïa u Conrad Kongal Sangma Myntri rangbah ka jylla, ba hadien ba ki dkhot ka Regional Committee on Border Dispute jong ka West Khasi Hills, ki la pyndep ban pynlong ïa ka jingpynsngew paitbah bad sngap ïa ka mon jong ki, u Myntri Rangbah um dei ban shu bret ïa ka report jong ka Regional Committee, hynrei u dei ban shim ka jingkitkhlieh ba ka jingpynbeit ïa u pud u sam ka dei ban long thik katkum ki paitbah.
La ong ruh ba lada ka jingpynbeit ïa ka Langpih sector kam long katkum ka jingkwah jong ki paitbah nongshong shnong, u Myntri Rangbah bad ka sorkar jong u ki hap ban kitkhlieh lada jia kino kino ki jingïaklumar lane ki huri hura, kiba lah ban poi haduh u pud jong ka jingthut ha ka shong suk shong saiñ bad ka jingshong syier jong ki paitbah nongshong shnong ha ka thaiñ baroh kawei.