Ïatreilang ki nongñiah kali kamai Meghalaya bad Assam ban pynpoi suk ïa paidbah

0

Nongpoh, Naiwieng 23: Namar ka jingshah khang jong ki kali ba kamai bad kumjuh ruh ki kali shimet kiba wan na Assam ban rung shaka jylla Meghalaya, naduh hynnin ka sngi tang hadien ka jingjia ha Mukroh, naka bynta ka jingshngaiñ jong ki nongleit nongwan, ki nongñiah kali kamai jong ka jylla Meghalaya bad Assam tang ban pynpoi suk ïaki nongleit nongwan bad ban nym ktah ïaka kamai kajih jong ki, kila mih shakhmat ban ïatreilang bad ban ioh kamai lem khamtam ban pynpoi suk ïaki nongleit nongwan lyngba ka kam kaba ki shakri.
Haba ioh ruh ban ïakren bad katto katne ngut ki nongñiah kali kamai kila pynpaw ba ki kali kamai ba kit ïaki passenger na Shillong kin pynhiar noh ha Jorabat ha kaba nangtei pat yn sa shimti ïaki da ki kali kamai ba na Assam kum ka jingïatreilang bad kan nym ktah ïaka kamai kajih ki kali kamai na Assam kiba ju kamai sha Meghalaya.
Ki la ong ruh lada kim ioh passenger kim banse ban shim haka dor kaba kham rem bad kum ki nongñiah kali kila pynpaw ruh ka jingsngew bynñiaw bad pynrem jur halor katei ka jingjia hynrei kum ka sorkar kam dei pat ban pyndik ïaki nongleit nongwan kaba ktah ruh wat ka kamai kajih jong ki kali kamai kiba ju kamai man ka sngi na Shillong sha Guwahati bad na Guwahati sha Shillong.
Ha kaba ïadei bad ka jingjia ha Mukroh naka liang kitei ki nongñiah kali kamai kila kyrpad sha ka sorkar ba kan pynkloi ïaka jingïakren ha kaba ka sorkar Meghalaya bad Assam ki dei ban shimkhia ha kaba ïadei bad katei ka jingjia.

Leave A Reply

Your email address will not be published.