Shillong, Naiwieng 23 : Ka Meghalaya ka la mad nam rem da hynñiew wicket ha ka Railways ha ka lympung ïalehkai U-25 Men State A Trophy ha ka jingïakhun hynne ka sngi Palei ha Chandigarh.
Hadien ba ka la jop ïa ka jingkynting pisa, ka Meghalaya ka la kam ban tied nyngkong hynrei ka la duh lut baroh ki wicket da kaba kamai tang 92 ron ha ki 33.1 over, ha kaba ka Railways ka la lah ban kynjoh sha ka thong tang ha ki 12 over.
Napdeng kiba kamai bun ron, u Jaskirat Singh u tied 13 ron bad ka Meghalaya ka la hiar ka jingkamai ron da 30 ron ha ka jingduh noh 8 wicket. Hynrei ki rangtied ba khyndai, shiphew bad khatwei kata u Bipin Kr Ray u kamai 16 ron, u Sudhir Sahani 24 ron bad u Manish Sharma 15 ron (not out) ki la kyntiew ïa ka ron sha ka 62 ron na bynta ka jingduh noh shiphew wicket ha kaba ka Meghalaya ka buh ka thong ba 92 ron.
Ka Railways haba wan beh ïa katei ka thong, ka la lah da kaba suk ban tied bad kamai haduh 55 ron ha ki saw over shwa ba kan duh tang 1 wicket. Ki arngut kiwei pat ki la hap wicket noh, hynrei ka Railways ka khlem duh mynsiem bad lah syndon ban pynliem ïa ka Meghalaya. Kiba la khur wicket na bynta ka Meghalaya ki long u Agreas Chamcham Sangma u ïoh 2 wicket ai kamai 18 ron bad u Manish 1 wicket ai kamai 23 ron.
Ka Meghalaya kan pynkhreh pat ban ïakhun pyrshah ïa ka Pondicherry ka ban sa long ha ka 27 tarik Naiwieng 2022.
