Nongstoiñ, K’lyngkot 14: Uwei pa uwei u briew u don la ka jong ka jong ka sap kaba u Blei nongbuh nongthaw u la ai, la u dei u ba biang ha ki dkhot met ne u ba duna ha ki dkhot met na ki ba bun ki daw, la ka long na ka jingur jinghap ne na kiwei pat ki jingjia ki ba bun jait.
Napdeng kiba bun ki briew kiba ngat ha kine ki jingjia, don kiba pyrshang ban wad ïa ka sap ba kyrpang bad ki pyndonkam hok ïa katei ka sap, na ka bynta ban kyrshan ïa la ka ïng ka sem bad ka jingim ba man ka sngi.
Uwei napdeng ki rangbah kiba la pyndonkam hok ïa ka sap ba u Blei u la ai, u dei u bah Koles Masla na Mawhati Ribhoi District uba la matlah baroh ar tylli ki khmat. Hynrei, u don pat ïa ka sap rwai bad ka sur ka bym da pher than na ka sur u kaitor ba pawnam tam hangne ha ri Khasi u bah Skendrowell Syiemlieh (bam kwai ha ïing u Blei).
Ha ka sngi saitjaiñ ka 13 tarik Kyllalyngkot, u bah Koles u la poi ha Nongstoiñ bad ryngkat bad uwei na kiba ha ïing u ba ju synran bad ïalam ban btin ïa u haba u leit rwai kylleng kylleng. Haba u la rung hapoh ïew Nongstoiñ u la pan jaka ha khyndiat ha dong jong kawei ka dukan bad u la sdang ban kynud ïa ki sur kiba bang ba syiang, ha kaba ki paitbah nong wan iew wan hat ki la ang lyngngoh bad ki la ïa pynnoh ïa ki jingai sngewlem ban ïarap ïa utei u rangbah.
Haba ïoh ban ïakren bad u, u la ong ba hynñiewsnem mynshuwa u la duh noh ïa ka bor ïohi ha baroh ar tylli ki khmat bad u la pyrshang ban wad lad wad lynti kumno ban kyrshan ïa la ka jingim, hynrei um shym lah satia ban lap da kano ka lad un pyrshang.
U la ong ruh ba namar ba u dei u ba sngew tynnad bad ieit bha ïa ki jingrwai naduh dang rit, kumta u la pyrshang ban pyrthuh bud ïa bun tylli ki jingrwai ban kynud bad ha kaba khatduh u la sngewthuh ba ka jingrwai ka dei ka sap kyrpang kaba u Blei u la ai ha u bad u la sdang ba pyndonkam hok ïa katei ka sap ba kyrpang ba u don.
U la ong ba u ju leit bvan rwai ha ki jaka ïew bad ha ki jaka ba kham long sor kylleng ki jaka ïew ha Ri Bhoi District, ha Sohra, ha Shillong bad ha kiwei kiwei ki jaka bad haba u leit ban rwai u ju rwai tang ïa ki jinrwai niam, ki jingrwai ieit ri bad ki jingrwai kiba ki paitbah ki kham sngew tynnad ban sngap.
U ba haïing u ba ju ïalam ïa u, u la ong ba nalor ba u matlah u la duh noh ïa ka kmie naduh dang rit. U don saw ngut shi para ar ngut ki shynrang bad ar ngut ki kynthei bad ka jingmat lah jong u, ka dei na ka daw jong ka jingshitom ha kaba nyngkong u dang mat lah tang kawei ka khmat. Hynrei ka jingpang ka nang ktah suki suki bad u la duh noh ïa ka bor ïohi na baroh ar tylli ki khmat.
