Shillong, K’Lyngkot 14 : Ka NEHU Student Union (NEHUSU) bad ka Education Cell ka Hynniewtrep Youth Council (HYC) ki la pyntip ba shen kin sa leit ban dawa ban mang lypa 80 persen ka bhah kyrpang na ka bynta ki samla pule trai ri trai muluk ha ki jaka pule hapoh ka Jylla.
Haba kren sha ki lad pathai khubor u nongïalam ka NEHUSU u samla Mandor Diengdoh u la ong ba kawei kaba ktah bha ïa ki samla pule jong ka jylla ha ka liang ka pule puthi ka dei ka Central University Entrance Test lane kaba la tip kum ka CUET Exam.
U la ong ruh ba ka CUET ka long ka eksam kaba kongsan na ka bynta ki college kiba bun bad lada ïoh ïa ki mark baheh ha ki class 12 bad duna mark ha ka CUET, kin nym ïoh ban rung ha ki college.
Shuh shuh u ong na ka liang ka NEHUSU bad HYC kan sa leit ban rah ïa ka dorkhas ha ka Sorkar Jylla ba kan mang lypa 80 persen na ka bynta ki samla pule kiba dei trai jylla khnang ba ka ailad ïa ki samla ban bteng ïa ka jingpule ka jong ki.
“Lada ym don ka bhah kyrpang, ki khynnah samla ka Ri kiba bun kin hap ban shong haïing wat haba ki don ïa ka mon ban bteng ïa ki jingpule jong ki hynrei ka lad ka lynti kan long kaba jwat arshah laishah ban ïa kaba ïanujor ha ki snem bad ki por kiba la leit” la ong u samla Mandor.
