Shillong, Risaw 31 : Ka Hima Khyrim ka la maham jur ïa ki YouTube Channels shimet (youtubers) bad ki nongshna Documentary ne ki nongpynsaphriang khubor ha ki Social Media, ba kim bit ban pynmih ïa kano kano ka video ne khubor jong ka Shad Nongkrem khlem da ïoh jingbit na ka Dorbar jong ka Hima.
Kane ka jingmaham ka la mih namar ki jingjia ha ki snem bala leit noh ha kaba la pynsaphriang ïa ki jingtip ki bym ïahap halor ka Shad Nongkrem, kaba lam pynban sha ka jingïalam bakla ne pynsngewthuh bakla ïa kito ki briew ki bym da tip ïa ka jinglong kongsan jong kane ka jinglehniam.
Ka Shad Nongkrem ba ju tip ruh kum ka Shad Pomblang , ka dei kawei na ki jinglehniam tynrai jong ka Jaidbynriew Khasi ha Jylla. Kane ka jinglehniam ka neh haduh san sngi bad ju pynlong ïa ka ha u bnai Naiwieng ha Smit, ka Nongbah jong ka Hima Khyrim.
Ka Pomblang ka dei ka jinglehniam ban ainguh ïa ka Lei Synshar, kum ka jinglehkmen halor ka jingseisoh ka rep ka riang bad ka jingkiew shaphrang jong ki khun ki hajar.Ka Hima Khyrim ka la pynkhreh pynkhrum bha ban pynthikna ba kane ka jinglehniam Pomblang lane Shad Nongkrem 2023, ka ban long ha ka 1 tarik bad 2 tarik Naiwieng kan long kaba jop.
U Myntri ka Hima u bah Valentine Sohtun ula ban jur ïa ka jinglong kyrpang kane ka jinglehniam kaba la ïaid da ki pateng la pateng. Ula kyntu ïa ki YouTube Channel shimet bad ki nongleh Social Media ba ki dei ban da pan jingbit na ka Dorbar hashuwa ban pynsaphriang ïa ki khubor, video bad documentary jong ka Shad Nongkrem khnang ba kin lah pynsaphriang ïa ka khubor kaba long thik kumba ka long, la ka dei hapoh ka Jylla ne shabar ka Jylla ruh kumjuh.
Kane ka sienjam, kat kum ka jingong u Myntri Sohtun, kam dei satia kaba jied briew ïano ïano ruh, hynrei ula ong ba baroh ki lah ban wan ïashimbynta ha kane ka jinglehniam bad ring video ïa kane ka kolshor ka Jaidbynriew. Hynrei ïa kito kiba shna documentary ne pyllait khubor, ki dei ban ïasyllok shuwa ba ka Dorbar la ka dei bad u Syiem Khynnah ne u Syiem Rangbah ka Hima Khyrim. Kane ka dei tang ka sienjam ban khanglad ïa ka jingbatai bakla ïa ka jingmut ba shisha jong kane ka jinglehniam.