Jowai, Risaw, 31: Ka Hynñiewtrep Border Disputed Redressal Forum (HBDRF) ha ka sngi Baar ryngkat ki nongïalam shnong ki la ujor ha u Deputy Commissioner jong ka West Jaiñtia Hills District u Bah BS Sohliya halor ka jingshah pyndik jong ki paid nongshong shnong ka Elaka Labang Nangphyllut & Pangam Raliang kaba juh tip kum ka Block-1.
Ha ka shithi ujor ba la aiti ha ka Additional Deputy Commissioner ka Kong B. Blah, ka Forum ka la pyntip halor ka jingshah pyntieng pynsmiej jong ki Khasi-Pnar halor ka jingthmu jong ka Sorkar Meghalaya bad ka Sorkar Assam ban ïa pynbeit pud hadien ba ka Sorkar ka la rai ban pynbeit ïa u pud u sam katkum ka mon jong u paitbah nalor kiwei kiwei de ki mat.
“Hynrei kaba sngewsih ka long ba ki Karbi ki pyrshang ban leh da ka buit thok ban khroh ban kjor bad da ka bor ban pyntieng pynsmiej ïa ki Pnar/Khasi ba shong ha khappud khnang ba kin ym nud ban pynpaw ïa ka hok lane ïa ka jingkwah jingthrang jong ki ban don shapoh Meghalaya bad la kyntu ïa ki bor District bad ka sorkar Meghalaya ban shim khia ïa kane,” la ong ka Forum.
“Sa kawei ka long ïa ki Khasi-Pnar kiba sah ha Block-1 la khanglad ban pynlong ïa ki jingïalang paitbah bad kane ka jingkhang pyrshah da ki Karbi ïa ki Khasi-Pnar kiba shong basah ha kine ki thaiñ ban pynlong kino kino ki jingïalang paitbah kiba wat lada ki long ha kano kano ka rukom bad khamtam eh ha ka jingïadei bad u pud u sam,” la pynpaw ka Forum.
“Kumba long mynta, la ïathuh ba ka jingpakhang lynti ban leit ban wan sha Meghalaya naduh ba ki Myntri Sorkar bad ki Chairman jong ki Regional Committees jong ka Sorkar Assam bad Meghalaya, ki DC bad SP jong ka West Jaiñtia bad West Karbi Anglong bunsien ki la kyntu ïala ki jong ki briew ban don noh ka jingïashong suk shong saiñ bad ban ïoh laitluid ha ka leit ka wan bad ba ki briew na Assam ki dei ban ïoh ïaid laitluid sha Meghalaya bad ki briew na Meghalaya ruh ki dei ban ïoh ïaid laitluid sha Assam hynrei kaba sngewsih ka long ba haduh mynta mynne khamtam eh na ka liang ki Karbi ki dang khang ïa ki briew jong ngi ban leit ban wan sha Meghalaya,” la ong ka Forum.
“Kane ka jingjia khamtam eh ka jia mynta sha ki thaiñ Khanduli Lapangap ha kaba ki briew jong ngi kiba shong basah ha ka Raid Nongjrong bad Raid Labang kim ïoh ban leit suk wan suk sha Meghalaya khamtam eh lada ki tip ba dei ki kynja jingïalang lada kino kino ki jingïalang ruh. Wat ha ka pang ka shitom ruh kim shah ban leit wad dawai dashin da kaba suk. Hooid, ki don ki Health Center, ki Hospital sha Karbi Anglong Assam hynrei ki briew jong ngi pat kim sngewthuh bad kim nang ban kren ïa ka ktien Karbi-Assamese bad kane ka la buh jingeh bha ïa ki,” la ong shuh shuh ka Forum.
Ka Forum ka la pyntip shuh shuh ba ka jingkhang ban die ïa ki mar ki mata ka la ktah jur bha ha ki thaiñ Khanduli bad Lapangap bad ki Khasi-Pnar kiba shong basah ha Raid Nongjrong Raid Labang kim ïoh ban leit die ïa ki mar rep sha ki ïew kiba don shapoh Meghalaya kum sha Khanduli Namdong, Wahïajer bad kidei kiwei de. “La ong ruh ba ki Khasi Pnar kiba im da ka rep ka riang, ki pynmih ïa ki mar rep kum u khaw, ki jhur bad bunjait, u nei lieh, nei ïong, khniang ryndia, ki syiar, ki sniang ki blang, ki muid, u sying, u synsar ka dieng Chinnamon bad kiwei kiwei de,” la ong ka Forum bad bynrap, “kiba bun na kine ki marrep khamtam ki jhur bad u ñiang Ryndia ki jingri kum ki syiar, ki sniang, ki blang kim ïaid ïew sha poh Assam. Kumta da ka jingpakhang ki Karbi ka ktah bha ïa ka jingim jong ki briew kiba don ha kane ka thaiñ.”
“Naduh hyndai hynthai kulong kumah kane ka dei ka ri jong ngi , ym dei ba ngi ba shong shapoh Karbi, hynrei dei ki Karbi kiba wan shong wan sah sha ka ri jong ngi. Ngi hap shapoh Karbi Anglong Assam ym da ka mon jong ngi hynrei dei da ka jingleh bor jong ka Sorkar Assam ha ka por ba thaw ïa ki District Council bad pynhap jubor ïa ngi sha ka United Cachar & Mikirs Hills ha ka jaka ban don hapoh United Khasi & Jaiñtia Hills District Councils,” ong ka HBDRF.
“Hadien kane, ka Sorkar Assam ka la kubur ba ka don ka jingbakla ha kaba pynhap jubor ïa kane ka jaka sha Mikir Hills lyngba ki Notification ha ka snem 1957-1958. Ka la bthah ruh ïa ki ar tylli ki District Councils, kata, ka United Cachar bad ka United Khasi Hills ban leh ïa ka re-examine lane Joint Enquiry. Kine ki artylli ki District Council ki ladep sorjamin bad ki la ai ruh ïa ki kaiphod jong ki, kiba dei ban pynphai biang sha Meghalaya. Kumta lyngba kine ki nongrim bad jingshisha ki ïeng skhem ba ka Block,-1 kam dei shuh ka jaka kaba la hap pura shapoh Karbi Anglong, Assam hynrei ka dei ka jaka kaba ladei ban wanrah biang sha Meghalaya,” la ong shuh shuh ka Forum.
Ka Forum ka la ong ba ka Sorkar Meghalaya, ka Jaiñtia Hills Autonomous District Councils bad ki bor synshar jong ka West Jaiñtia Hills District lem bad ki paid nongshong shnong jong ka Ri Khasi Jaiñtia kim dei ban ailad ïa ki Karbi ba kin leh trai khlieh bad ban leh donbor nadong shading ïa ki Khasi-Pnar.
Ka Forum ka la dawa ïa ka Sorkar Meghalaya, ïa ka JHADC ba kin pynrung kyrteng noh kloi kloi katba lah ïa ki shnong baroh kiba don hapoh Block-1 bad ban pynpoi ïa ki lad jingïarap ban ai jiingïada sha ki Khasi-Pnar.
