Shillong, Risaw 31: U Myntri Rangbah ka jylla u Conrad K Sangma, mynta ka sngi ula ïashimbynta ha ka jingïalang pynhap pyrda ïa ka jingrakhe ïa ka Taiew ki Mrad Khlaw ne Wild Life Week 2023.
Haba kren ha ka jingïalang, u Conrad K Sangma, ula ong, ba ka tnad Forest ka dei kawei na kiba kongsan kaba ka sorkar ka pynleit jingmut bha.
“Ngi la ïaid mynta ha ka lynti ban ïada ïa ki khlaw ki btap bad ka mariang bad ngin trei ha ka dur jong ka mishon da kaba pynleit jingmut ha ki mat kiba kongsan ban pynthikna ba ka tnad kan ïaid shakhmat bad ngin pynthikna ruh ba ngin ai ïa ka jingkyrshan, ka jingbei tyngka bad jingbtin lynti ïa ka tnad Forest” ula ong.
Ula ong ruh ba ka Meghalaya ka dei kaba la kyrkhu bad kaba don kyrpang ïa ki mrad ki mreng hynrei haduh mynta ym shim la lah pat ban ïaid shaphrang ha ka lynti kaba la pynwandur bha bad ha ka jingstad saian.
U Myntri Rangbah ula banjur ruh ïa ka jingkongsan ban ïatreilang hapdeng ka sorkar bad ki paidbah.Ula banjur ruh ïa ka jingdonkam ban don ïa ka Elephant Corridor ne ka lynti ïaid ki hati hapdeng ka jylla Assam, Meghalaya bad ka ri Bangladesh.
“Nga kloi ban ïatreilang bad ka sorkar Assam bad ki kynhun bar ri ban pynwandur ïa ka elephant corridor ka ban long ka jingïada bad ban plie ïa ka lynti ïaid ki hati ba kin ïaid da kaba suk” ula ong.
Ula ïathuh ruh ba survey halor ka jingdon ki Hati bad kiwei pat ki mrad ha ka jylla ka dei ka mat jong kane ka tnad sorkar.
“Kadei tang lyngba ka survey bad lyngba ki jingtip kiba don kaba ngin lah ban shna ïa ki polisi treikam kiba biang ki ban ïarap ban ïa imlang hapdeng ki briew bad ki mrad,” ula pyntip.
Hashwa kane u Myntri Rangbah bad ki heh ophisar ki la ai khusnam sha ki nongtrei jong ka Wildlife halor ka jingtrei shitom ka jongki bad la sam ruh ïa ki khusnam sha ki nongjop ha ki jingïakob bapher bapher kiba la pynlong shi bynta jong ka jingrakhe ïa ka Wild Life Week.
