Shillong, Risaw 31 : Ka Sorkar Jylla kan sa thungkam noh shen ïa palat 1,500 ngut ki briew ban pyndap ïa ki jaka ba thylli hapoh ka Tnad Pulit.
Haba pyntip ïa kane hadien ka jingialang ka Kynhun Myntri mynta ka sngi Ba-ar, u Myntri Sorkar Marcuise N Marak ula ong “Ngi la mynjur ïa ka revised uniform guidelines ban thungkam ïa ki Pulit hapoh ka Tnad Meghalaya Police”.
U Principal Secretary ka Tnad Personnel Bah CVD Diengdoh ula ong ba kane ka dei ka jingthungkam ha baroh ki kyrdan jong ki Pulit naduh ki Sub Inspector, armed branch constable bad unarmed branch constable kynthup ki fireman bad MPRO operator.
Ka Central Recruitment Board (CRB) ka la pynïaid ïa ka eksamin thungkam ïa ki Pulit kat kum ki Rules. “Ngi la ïohi ha ki snem bala leit ba kine ki jingthungkam ki shimpor bha ban dep namar kiba bun ki rule. Na kata ka daw ngi la pyrshang ban pynbeit ryntih ïa ki rule khnang ba ngin lah pynthikna ba ka jingthungkam kan dei kaba pyndep ha ka rukom kaba janai, kaba shai bad kaba kloi” ula ong.
Halor ka jingkylli, u Bah Diengdoh ula ong ba ki don haduh 1500 tylli ki kam kiba lait hapoh ka Tnad Pulit.
“Hadien bala dep ban pynkylla ïa ki Rules, ngin sa pynmih jingpynbna bad hadien ngin sa pynbna laitkam ïa kine ki kam kiba lait bad ka CRB kan sa pynthikna ba kan pynlong bad pyndep noh kloi ïa ka eksamin rungkam” ula ong.
Ha kajuh ka por, ka Kynhun Myntri kala mynjur ruh ïa ka Rules ban pynlong ïa ka Departmental Examination, 2023 ïa ki Ophisar jong ka Indian Police Services (IPS).
“Ha ka jingshisha ïa ka Departmental Examination ïa ki Ophisar IPS la ju pynlong da ka UPSC ban pynkiew kyrdan, hynrei mynta yn sa pynlong noh da ka MPSC hangne hapoh ka Jylla” ong u Marcuise.
