Shillong: Nailur 12 : Ki pulit ka nongbah Shillong mynta ka sngi Palei, ki la pynjur ka jingpahara hakhmat ka Shillong Press Club, hadien ba ki nongïalam ka dkhot ka HYC ki la ïalum hakhmat ka SPC ba thmu wan ai Press Conference ka kynhun u Jagadguru Shankaracharya Avimukteshwaranand Maharaj of Jyotirmath (JASMJ) ïa kaba ka HYC kala ïoh jingtip ba kane ka kynhun kan pyrshah jur ban pyniap bad ban bam doh ïa ki masi.
Ka HYC haba kala ïoh jingtip ba katei ka kynhun kan wan kren ban ai jingpynbna ha ki nongthoh khubor, kumta kila ïa wan ban ïalum hakhmat ban ïakren bad katei ka kynhun. Hynrei ki pulit bad u Majistor kila wan poi ban pynjur ïa ka jingpahara ban peit ba kan ym mih kano kano ka huri hura.
Hynrei hadien ba ki nongïalam ka Shillong Press Club kila ïoh ïakren bad katei ka kynhun ba thmu pynlong ïa ka Press Conference ba kila pynthikna ba kin ym lah ban pynlong shuh ïa ka Press Conference kumta ki dkhot ka HYC ruh kila ïa pra noh na katei ka jaka.
U President ka HYC, u Bah Roykupar Synrem haba ïakren bad ki nongpathai khubor, ula mahan tyngeh ba lada katei ka kynhun kan wan pynlong ïa ka rally ban ïalap sangeh bam doh masi ne ban kheiñ kordor ïa ka masi kum ka kmie jongka jaidbynriew na ka liang ka seng ha kajuh ka Sngi kan pynlong da ka rally bam doh masi.
Ula ong, ba ka jingwan jong ka HYC hajan ka Shillong Press Club kam dei ban thaw jingkulmar hynrei kadei ban ïa kynduh ïaki nongïalam ka ‘Jagatguru Shankaracharya Ji Maharaj’ ban pynsngewthuh ba 95% ki nongshong shnong ka Meghalaya ki bam doh Masi.
U Bah Roy Kupar ula ong ruh ba ka seng kala buddien ïa katei ka kynhun bad kadei hi ka kynhun kaba leit sha kiwei pat ki jylla ka thaiñ¨ shatei lammihngi ban pyrshah ban bam doh masi.
