Shillong, Nailur 12: Ki nonghikai jong All Meghalaya SSA Teacher Association (AMSTA) ha ka sngi palei ki lah wan ïakynduh ïa ki lad pathai khubor halor ka jingleh mynthi ka sorkar haba ïadei bad ka jing sahteng ban pynkiew tulop ïa ki nonghikai SSA.
Haba ïakren bad ki lad pathai khubor na ka liang u General Secretary ka All meghalaya SSA Teacher Association u Bah Wanpyndap-Hi Lapang bad ka kynhun ki la dawa ba ka sorkar ka dei ban pynkiew noh ïa ka tulop jong ki nonghikai hapoh ka shatri jong ka All Meghalaya SSA Teacher Association namar la 8 snem kynthih mynta ka sorkar ka leh bym suidñiew halor ka jingdawa jong ki ban pynkiew ïa ka tulop.
Na ka liang u General Secretary bad ka kynhun jong ka AMSSATA ki la wan buh da ka shithi ha ophis Myntri Rangbah, ki la pyrshang ban ïakynduh ïa u Myntri pule puthi hynrei um don ha ophis treikam.
U Bah Wanpyndap Hi Lapang bad ka kynhun ki la ai por ïa ka sorkar haduh ka 30 tarik Nailur 2024 bad lada ka sorkar kam leh ei ei, na ka liang jong ki, ki ïa wer ïa ki nonghikai ban ïasnoh kti lang ba kin pynlong da ka jingïakhih ha Shillong.
