Nongpoh, Naiwieng 22: Da ki spah ngut ki paidbah na lai tylli ki shnong ba kynthup ïa ka shnong Amphanggre, Matchokggre bad ka shnong Umpher hapoh ka lama jong ka Joint Action Committee (JAC) ryngkat ki kynhun kum ka KSU, RBYF, FKJGP, Byrnihat Citizens Forum, Garo Students Union, Ri-Bhoi Regional Unit, Byrnihat Women Society lem bad khynnah skul ha ka sngi Thohdieng ki la pynlong da ka jingïaid paidbah ban pynpaw ka jingpyrshah kaba jur ïa ka jingthmu jong ka Sorkar Jyllla ban pynlong ïa ka spah akar ka khlaw barben jong ka Soil and Water Conservation kum ka nongbah ki Karkhana ba yn shimti da ka Invest Meghalaya Authority.
Ki paidbah ki la rah ruh da ki plakad bad pynrem jur ïa ka Sorkar Jylla kaba thmu ban pynbam da ki jaboh jong ki karkhana, wat hadien ba ka Byrnihat ka la paw kum kawei na ki jaka ba jaboh tam ha Ri India. Ïa ka jingïaid paidbah la sdang na iingdorbar jong ka shnong Umpher bad la pynkut ha khmat ka ophis treikam jong ka CTI.
Haba kren ha kane ka sngi ki nongïalam shnong, ki longkmie bad ki kynhun bapher bapher ki la kren shai sha ka sorkar ba daleilei kin nym ailad ïa ka khlaw jong ka jong ka tnat Soil and Water Conservation ban pynkylla sha ka Industrial Estate namar kim kwah shuh ban dang long nyngkong ha ka jingjaboh hakhmat ka pyrthei.
Ki la pynpaw ruh ba ka jaka ka dei kaba ai jingtngen ïa ka thaiñ Byrnihat bad ki paidbah nongshong shnong ha kane ka thaiñ ki ïoh ruh ka umbam umdih na ka jingdon jong ka khlaw, hynrei lada ka Sorkar kan pynkylla karkhana ïa ka jaka kan long ka jingtim ïa ki paidbah nongshong shnong bad ki la pynrem jur ruh ïa ka Ssorkar kaba la shu leh sop sop ïa ka kam khlem ka jingtip jong ki paidbah.
Hadien ka jingïaid paidbah ki nongïalam ki la rai ruh ban leit kynduh ïa u Myntri Rangbah ka jylla u Conrad K Sangma ban dawa ba u dei ban pynsangeh mardor ïa ka jingthmu jong ka Sorkar namar kum ki paidbah kim kwah da leilei ba ha khlaw barben kan kylla long ka nongbah jong ki karkhana.
