Shillong, Naiwieng 22: Kiba shong dukan die madan naduh Motphran sha Khyndailad ha ka sngi Thohdieng ki la pynpaw ïa ka jingpyrshah bad ki la leit ruh ban tur sha office jong ka Shillong Municipal Board (SMB) ban pynpaw ïa ka jingpyrshah halor ka jingthmu jong ka sorkar ban pynkynriah noh ïa ki na ki jaka ba ki ju shong manla ka sngi.
Haba kren sha ki lad pathai khubor na ka liang ka President jong ka Meghalaya & Greater Shillong Progressive Hawkers and Street Vendors Association (MGSPHSVA) ka kong Biolin Pyrtuh la ong ba ki nongmihkhmat na ka seng ki la kynduh ïa SMB executive engineer FB Chyne ban pan ka jingpynshai halor ka jingkren jong u Myntri ka tnat ki kam jngohkai u Bah Paul Lyngdoh ba ka sorkar ka la pynkhreh ban pynkynriah noh ïa ki na ki jaka ba ki ju shong kaba long naduh na Motphran sha Khyndailad ha ka 24 tarik mynta u bnai.
“U Myntri u la ong ïa kane ka jingkren wat hadien ba u la tip bha ba ka la don ka committee, kaba la thung ban khmih ïa kane ka kam jong kiba shongdie madan bad ba kiba shong die madan ruh ki la dei ki dkhot jong kane ka committee. Ngi kwah ruh ban pyntip sha u ba lada u Bah Paul u kwah ban long uba die jingdie ha madan ngi long kiba kloi ban pdiang ïa u ban long kumta. Ngi long kiba kmen ban ai jaka shong die madan ïa u,” ka la ong.
Haba ong ba kiba shongdie madan ruh ki tip bha ïa ka aiñ, na ka liang ka kong Pyrtuh ka la ong ba u Myntri u dei ban kiar ïalade ban pynmih ïa ki jingkren ki bym don ka jingkitkhlieh naba um lah ban pynbeit ïa kane ka kam.
“Namar kata kiba shong die madan kim dei ban don ka jingtieng hynrei ban shaniah ïa ngi kiba dei ki dkhot jong ka committee naba ngin sa shim ka rai halor ki jaka ba ngi dei ban ïoh shong. Ngi kyrpad ïa baroh kiba die madan ban sdang biang ïa ki kam ki jam jong ki ban kamai kajih,” ka la ong.
Halor kane na ka liang jong u Myntri ula pyntip ba ka kam ban pynkynriah ïa kumba palat 200 ngut kiba shongdie madan yn sa pyndep shen kaba long ruh kum ka jingthmu jong ka sorkar ban pynlong ïa ka Khyndailad kum ka lynti ban ïaid tang da ki paidbah, bad 3 tylli ki jaka ha ka thaiñ Khyndailad la ithuh na ka bynta ban pynkynriah bad buh ïa kiba shong die madan kaba kynthup ïa ki building jong ka MTC bad ka MUDA.
Haba kylli halor kane na ka liang ka president jong ka seng ka la ong ba na ka liang ka SMB ka la ïathuh ba kam tip satia halor ka jingthmu jong ka sorkar bad kam tip ruh ïa kita ki 200 ngut ki hawker kumba la kdew da u Myntri ka sorkar. “Hynrei na ka liang u Myntri u la kam ba yn pynkynriah ïa ki hapoh ka 24 tarik mynta u bnai, ha kaba kane ka sngi ka dei ka sngi U Blei. Shuh shuh na ka liang ka SMB kam don jingtip shaphang ki 200 ngut kiba shongdie madan, ïoh ki lah ban long kiba haïing hasem jong u Bah Paul Lyngdoh, kata te ngim tip,” ka la ong.
Na ka liang ka kong Pyrtuh ka la ïathuh ba ki la don kumba 5,000 ngut kiba shongdie madan bad kumjuh ruh kiba shongdie harud surok kiba la pynrung kyrteng bad ka association.
