Shillong, Naiwieng 22: Ka Meghalaya High Court ha ka sngi Thohdieng ka la rai ban khmih bniah biang halor ka jinglong jingman jong ka North Eastern Hill University (NEHU) ha ka 6 tarik u Nohprah, hadien ba ka inquiry committee kaba tohkit halor ki jingkynnoh pyrshah ïa u vice chancellor Prof PS Shukla bad ki jingdkoh treikam ha kane ka skulbah ka la phah ïa ka kaiphod tohkit bad ïa ki jingai jingmut.
Ha ka hukum ba la pynmih hadien ba la sngap ïa ka PIL, ka miej ki nongbishar ba kynthup ïa u Chief justice IP Mukherji bad justice B Bhattacharjee ki la ong, “Ngi tharai ba ha kane ka por ka long kaba dei ïa ngi ban ap ïa ka kaiphod jong ka committee, bad ïa ki jingai jingmut jong ka bad kino kino ki jingkdew ban pynbeit lada don ka jingai jingmut jong ka committee bad kaba dei ban pdiang da ka University. Ngin buh teng shwa ïa kane ka kam tat haduh ka 6 tarik Nohprah, 2024 ban khmih bniah biang ïa ka jinglong jingman jong kane ka kam.”
Na ka liang ka ïingbishar ka la pynpaw ruh ïa ka jingsngewhun ïa ka jingshim rai jong ki samla pule ban sangeh noh ïa ka jingïakhih shah thngan hadien ka jingpynmih ïa ka hukum ha ka 20 tarik mynta u bnai.
“Kumba la kdew ha ka hukum kaba mynshwa kaba la pynmih ha ka 20 tarik Naiwieng, 2024, ka hukum kaba 14 tarik Naiwieng, 2024 ba la pynmih da ka Ministry of Education, Department of Higher Education, New Delhi ban thung ïa ka committee ban tohkit halor ki jingkynnoh pyrshah ïa u Vice Chancellor bad kumjuh ruh ki jingdkoh treikam ha kane ka skulbah.
La bthah ïa ka committee ba ka kan aiti ïa ka kaiphod hapoh ka 15 sngi naduh ka tarik ba la pynmih ïa ka hukum ryngkat bad ki jingai jingmut ba kongsan na ka bynta ki kam ban pynbeit. Kane ka jingai por kan kut ha ka 29 tarik u Naiwieng, 2024, ong ka ïingbishar ha ka hukum jong ka.
