Kumno ban ïarap lada khynñiuh u jumai bajur ai jinghikai ka ophis DC, DDMA & NDRF
Mawkyrwat, ‘Naiwieng, 22: Ka ophis jong u Deputy Commissioner ka South West Khasi Hills District ryngkat ka jingïatreilang bad ka District Disaster Management Authority (DDMA) lem bad ka 1st Battalion jong ka National Disaster Response Force (NDRF) na Guwahati, ha ka Sngi Thohdieng ki la ai jinghikai ha ka mock drill kumno ban ïarap ïa kiba mynsaw lada wan lynshop ka jingkhynñiuh u jumai uba jur ha ophis jong u Deputy Commissioner ha Mawkyrwat, South West Khasi Hills District.
Ha kane ka jingai jinghikai, la pyntreikam ïa ka kynhun ai jingïarap ne ka Incident Response Team (IRT) da ka Incident Command (IC), ba la ïalam da u Additional Deputy Commissioner ka South West Khasi Hills District Bah L.T. Tariang bad u CEO jong ka District Disaster Management Authority (DDMA).
Ka jingpynkhreh baroh ki la bud ryntih ïa ki jingbthah jong u IC, ha kaba la pyntreikam ruh ïa baroh ki bynta jong ka Incident Command kiba kynthup ïa ka 1st Battalion NDRF ba la lamkhmat da u Lal Ringsan, INSP, ka Operations Section Chief (OSC), ka Logistics Section Chief (LSC), ka Planning Section Chief (PSC), ka Staging Area (SA), ka Medical Aid Post (MAP), ka Offsite Control Room (COR), bad ka Relief Camp Manager (RCM).
Ïa kane ka jinghikai la pynlong kyrpang ha Ophis jong u Deputy Commissioner, South West Khasi Hills District, ha kaba ki don 12 ngut ki briew kiba la mynsaw, kynthup ïa ar ngut ki kynthei bad iwei i khunlung. Kane ka jingai jinghikai ka kynthup ïa ka jingpynkynriah, ka jingwad bad pyllait im, ka jingai jingsumar nyngkong, bad ka jingkit ïa ki briew kiba mynsaw lyngba ki Ambulance sha Medical Camp bad Mawkyrwat Civil Hospital.
Ha kane ka Mock Exercise la ïohi ïa ka jingïashimbynta kaba radbah na ki tnad laiñ bapher bapher, kynthup ïa ki ophisar bad ki nongtrei jong ka distrik, ki pulit, ki nongïada paidbah bad ki nongap pahara ïing, ki nongpynlip ding bad ki kam ba kyrkieh, ka tnad ka koit ka khiah, bad ka kynhun NDRF na Guwahati.
Ym tang kata, ha kane ka Mock Exercise halor u Jumai na ka liang ka 1st Battalion jong ka National Disaster Response Force (NDRF) ka la ïohlad ban pyni kumno ban ïarap ïa ki briew kiba la sah kut ha ki bynta jong ki mala ba ha jrong jong ki ïing lyngba ka jingpynhiar da ki tyllai ha kaba ki la don shibun ki jait jingleh kumno ban pynhiar ne ïarap ïa kiba la mynsaw.