Nongpoh, Rymphang 22: Ki Pulit ka Ri-Bhoi kila maham ïa ki nongñiah trok ba kim dei ban ñiah sha ka liang ka mon jong u surok bah, hynrei ba kin ïaid na ka liang ka diang, namar bun ki kali kim banse ban ïaid shakhmat (overtake) na ka jaka bym dei ne wrong side.
Halor katei ka jingmaham bad kum ka jinghikai ïa ki nongñiah trok ki pulit jong ka Nongpoh Traffic Police mynta ka sngi kila pynlong da ka jingtalasi ha surok bah National Highway 6 ha ka shnong Mawdiangum bad lap ba bun na ki trok ki ïaid na ka liang kamon jong u surok bah bad kumjuh ruh ban daiñ kuna ïa ki kali ba pynkheiñ aiñ bad ki nongñiah thuk thuk 2 sha ka ba khlem phong helmet.
Na ka liang ki pulit ka Ri-Bhoi kila kyrpad ruh ïa ki nongñiah trok ban bud ryntih ïa kane ka hukum bad kyrpad ruh ïa baroh ki nongñiah kali haduh ki thuk thuk 2 sha ka ba kin bud ryntih ïa ki kyndon aiñ ñiah kali ban lait na kano kano ka jingjia ba sngewsih bad kum ka tnad pulit kan daiñ da ka kuna pyrshah ïa kiba pynkheiñ aiñ.
Ha ka jingtalasi ki pulit mynta ka sngi ïa ki kali ba pynkheiñ aiñ kila ioh ban daiñ kuna T.5000/- bad T.13000/- ka pending challan bad baroh ka long T.18000/-.
