Nongpoh, Rymphang 22: Hadien kiba bun ki jingshah kynthah bad shah kynthoh jong ka skulbah University of Science and Technology Meghalaya, ki pulit jong ka PanBazar bad Special Task Force jong ka jylla Assam hynnin ka miet kila kem noh ïa u Mahbubul Hoque, Chancellor ka skul bah University of Science and Technology Meghalaya na ka iing sah jong u kaba don ha Guwahati.
Ïa ka daw tynrai ka jingshah kem jong u ym pat lah ban tip thikna, hynrei ki tyllong khubor ki ïathuh ba ka jingshah kem jong u ka dei namar ka jingkynnoh lehthok ha ka por ba pynlong ïa ka eksamin CBSE jong ka class 12 Physics ha kawei na ki skul kaba don ha ka jylla Assam bala pynïaid da ka USTM.
Kum ban shu pynpaw hangne ba ka skulbah USTM, ka dei kawei na ki skulbah shimet kaba la paw ha ka jylla bad ka thaiñ Shatei Lam Mihngi bad ka dei ruh kaba ju shah kynthoh bad shah kynthah na ka por sha ka por ha u Myntri Rangbah ka jylla Assam u Himanta Biswa Sharma naduh ka jingshlei um ka Assam ba dei na ka daw jong ka jingtih khyndew ha katei ka skulbah, ba ki samla kiba la dep pule na katei ka skulbah kim lah ban thep kam sorkar ha ka jylla Assam, ka jingkynnoh ba katei ka skulbah ka shna ïa ka khyrdop kum ka Mecca kaba dei ka jaka ba khuid katkum ka jingngeit Islam, khamtam ka jingai ïa ki syrnot thok sha ki samla pule wat kiba pyndep ïa ki kyrdan PHDs bad shibun kiwei kiwei ki jingkynthoh na u Myntri Rangbah ka jylla Assam.
