Shillong, Rymphang 22: U MDC ka BJP na Tura u Bernard N Marak u la kynnoh ba ka P A Sangma International Medical College and Hospital (PIMC) ha USTM campus imat ka la pynkheiñ ïa ki jingbthah jong ka National Medical Commission (NCM) kaba dei ban long katkum ka jinglong trai bad ban pynïaid ïa ka hospital kaba dei ban don la kumno kumno kumba 300 tylli ki jingthiah bad ki tiar kiba shongdor kaba dei ban pynlong kum ka jaka hikai hapoh ka campus jong ka Medical College kaba la ai jingmut.
Halor kane u MDC ka BJP na Tura u la ong ba kam don satia ka hospital hapoh ka P A Sangma International Medical College and Hospital kaba ha USTM campus. U la ong ba ki bor ba dei khmih bad ka sorkar jylla ka dei ban pynthikna ba kam dei ban don ka jingpynkheiñ ïa ki jingbthah jong ka National Medical Commission bad ba ka jaka pule ka dei ban bat ïa ki kyndon jong ka NMC.
“Kane ka kam nga la pynpaw naba nga la pule bad tip ba ka long kaba kongsan ba dei ban don haduh 300 tylli ki jingthiah ban pynïaid ïa ka Hospital bad ban pynïaid ïa ka Medical College. Lada don kano kano ka jingpynkheiñ ïa ki khynnah pule kiba hap ban pynlong da ki lak tyngka ka pisa bad da ka jingangnud ba kin shakri ïa kiba pang, ka jingim jong ki, ka jingpule bad ka lawei jong ki kin shah pynsniewdur. Ki kyndon ba thymmai ba la thaw da ka National Medical Commission la ong ba ka long kaba kongsan na ka bynta ki medical college ban buh ïa ka “Skill Laboratory” na ka bynta ban ai jinghikai ïa ki samla pule bad ban don ki jingai shakri ha ki kam ïasyllok ban ïarap ïa ki samla pule ba kin long kiba sngewtynnad ban pule bad ban sngew jahthait. Imat wat ka Skill Laboratory ruh kam don. Ka sorkar jylla bad ki bor pynïaid ki dei ban pynshai baroh balei ïa ka Medical College la lah ban pynïaid khlem da don ki 300 tylli ki jingthiah hapoh ka hospital bad kumjuh halor ka Skill Laboratory. Ka dei ban don ka jingpynshai kaba dei kumno la pynkhreh bad kumno ruh la ai ïa ki jinghikai khlem da ïaid katkum ki kyndon. Kane kan pynthikna ba ki samla pule kiba la pynlut shibun ka pisa na ka bynta ki course kin ym dei ban shah ban beiñ ha kano kano ka rukom,” Bernard N Marak, MDC Tura.
