Wat hadien ba ïakhun tyngeh khlem lah satia ka India ban pynliem ïa ka Bangladesh

Shillong, Lber 25 : Ka kynhun ïalehkai phutbol jong ka India wat hadien ba ki la ïakhun tyngeh ban jop ïa ka Bangladesh ha ka jingiakhun sdang jong ka jingiakhun knieh rung sha ka AFC Asian Cup 2027 pynban ka khlem lah satia hadien ba ka jingïakhun ka la kut noh khlem da don ba ïoh thep kol mano mano ruh.

Ha kane ka jingiakhun kaba itynnad bha kaba long ha madan JN Stadium Polo, Shillong la wan ruh ban sakhi da palat 14,900 ngut ki paid ieit phutbol ka Jylla. Kane ruh kadei ka sien kaba nyngkong ba ka nongbah Shillong kan ïoh ban pynlong ïa ki jingïalehkai barri ha ka nongbah hadien ba ka ïoh ban pynlong ïa ka Durand Cup bad kumjuh ia ka Indian Super League.

Haba phai pat sha ka jingïakhun, dei ka Bangladesh kaba ïoh nyngkong ban pynsyier ïa ki rangap dien ka India, kata ruh tang hapoh ki khyndiat minit mar ïa sdang ka jingïalehkai.

Ym tang katta ha ki 10 – 15 minit jong ka jingïakhun i kumba ka Bangladesh kan nion tyngeh ïa ka India hynrei kane ka la neh tang shi por hadien ba ki rangïalehkai ka India ki la ïoh ban pynsuki bad tehlakam ïa ka rukom pashat bol.

Tangba hadien kane ruh, ki rangïalehkai ka India ki khlem ailad satia bad ïoh ruh bun ki kabu ksiar tangba ki khlem lah satia ban ïoh pynkhih jar.

Ha kawei ka liang, ka jingdon jong u rangïalehkai English Premier League, u Hamza Chaudhury ha ka kynhun ïalehkai jong ka Bangladesh lah ban ong ba ka la ai mynsiem haduh katta ïa baroh kawei ka kynhun ban ïalehkai bha ha kane ka sngi.

Katba lada phai pat sha ka India, ka jingdon ki rangïalehkai kiba la rangbah kum u Sunil Chhetri sha khmat bad kumjuh u Sandesh Jhingan shadien ka la pynskhem ïa ka kynhun ban ïakhun tyngeh naduh kaba sdang tad haduh kaba kut.

  Na ka liang u coach ka India, u Manolo Marquez u la pynkylla san ngut ki rangïalehkai na ka kynhun ba ïakhun pyrshah ïa ka Maldives ha ka taïew ba la dep da kaba wanrah ïa u Boris Singh Thangjam, Udanta Singh Kumam, Lalengmawia Ralte, Sandesh Jhingan bad Farukh Choudhary.

Nalor u Liston, u Sunil Chhetri ruh u la ïoh katto katne ki kabu ksiar ban pynkhih jar tangba ka jingïakhun tyngeh jong ki rangap dien ka Bangladesh ka la pynpulom lut ïa ka jingpyrshang jong kine ki rangthep kol ba kynsai ka Ri.

Watla ka ri ka la mad ïa ka nam ïakhaid kaba mar 0-0 kol pynban ki paidbah nongpeit kai ki la ai ka jingïaroh bad ïeng ban ai khublei ïa ka kynhun ïalehkai ka Ri kiba la ïakhun tyngeh bad pyni ruh ïa ka rukom ïalehkai kaba itynnad ha kane ka janmiet.