Tura, Jymmang, 17: Ka jingïaksaid ka Sorkar Jylla ban weng ïa ka jingeh jong ki paidbah nongshong shnong namar ka jingbym ïoh ïa ka jaka thehñiut kaba biang, hynrei mynta ka kynti ka Sorkar ka la pyrshang ban weng ïa kane ka jingeh da kaba wanrah ïa ka mashin kaba long kum ka pajwa ban thang ñiut na ka ri South Korea.
Ïa kane ka mashin thang ñiut, kaba dei ka projek ba la ïatreilang da ka Sorkar Jylla bad ka Chamhana GW na ka ri South Korea, kaba long ruh ka projek kaba nyngkong eh ha ka ri India la plie paidbah ha ka shnong Rongkhong Songgittal ha Tura, West Garo Hills da u Myntri Rangbah ka Jylla u Conrad Kongkal Sangma ha ryngkat ka jingsakhi lang jong u Ambassador jong ka Republic of Korea u Jae-Bok Chang.
Ïa kane ka mashin la buh hajan ka jaka thehñiut jong ka sor Tura na ka bynta ban bret lut ïa ki jaboh jabaiñ kiba la wan kit na kylleng ka sor da ka jingpeit jong ka Tura Municipal Board.
“Haba nga leit jngoh ïa kane ka jaka thehñiut, nga kwah ban leh eiei bad ngam tip kumno ngan leh hynrei nga tip ba ngi donkam ban leh eiei halor kane ka jaka thehñiut bad ban wad ïa ki lad ki lynti kumno ban ïada ïa ka mariang. Dei tang ka teknologi kaba lah ban pynthikna ba yn dup lah ban weng ïa kane ka jingeh,” ong u Myntri Rangbah haba kren ha ka jingplie ïa kane ka projek.
U la Conrad Sangma u la ïathuh ba ïa kane ka projek ladep pyrkhat ban wanrah naduh u snem 2019 hynrei na ka daw ka jingwan lynshop jong ka khlam COVID-19 kane ka projek ka la sahteng.
Kane ka pajwa ka dei kaba lah ban pynkylla dpei ïa baroh ki jaboh jabaiñ hynrei lait noh tang ki kynja nar, ki iit bad ïa ki tiar ilektronik, ki tiar shna ing bad kiwei kiwei.
Ïa ki jaboh ba la pynkylla dpei yn thang pyndonkam pat kum u rnga.
U Myntri Rangbah u la ong ruh ba lada kane ka projek kan long kaba seisoh yn sa buh ruh sha kiwei pat ki district jong ka jylla.
U Ambassador jong ka South Korea sha India, u Chang Jae-Bok uba la wan iuhkjat sha kane ka jylla Meghalaya, u la ong ba kane ka pilot project ka dei kaba kongsan bad ka ban ïarap ïa ka ri India ha kaba pyndonkam ïa ki buit jingstad kum kane ka juk teknologi kaba mynta.
“Ka (Republic of Korea) Embassy ha New Delhi kan sa nang trei shitom shuh shuh ban wanrah kum kine ki projek kiba pynmyntoi ïa ki paidbah da ka jingïatreilang shuh shuh ha ki snem ki ban dang wan,” u la ong.
