Shillong, Jymmang 17 : Ka MLA jong ka Shillong East, Kong Ampareen Lyngdoh ka la ong ba ka kloi ban leit iakhun na ka party BJP lane na kano kano ka party ha ka elekshon MLA kaban long ha u 2023 lada ki paidbah nongkyrshan jong ka, ki kwah ban leh kumta.
Haba kren bad ki lad pathai khubor hadien ba la wai ka jingïalang ha Soso Tham Auditorium, katei ka MLA kaba don mynta ha ka jingshah sospon ha ka Congress ka la ong, “Lada donkam ban leit sha ka BJP ruh nga long kaba kloi, ngan leit sha kano kano ka party kaba biang.”
Katei ka MLA kaba dei kawei na ki san ngut ba ngat lang ha ka jingshah sospon na ka daw ka jingleit kyrshan ïa ka sorkar MDA, ka la ong ba ka sngewkyndit ba watla na ka Congress kim pat pyllait laitluid ïa ki san ngut hynrei napoh napoh pat ka la sei kyrtong da kiwei pat.
“Phi lah ban mutdur haba nga dang don ha ka Congress hynrei ngi la don pat ki kyrtong jong ka Congress ha constituency jongnga,” la bynrap shuh shuh katei ka MLA.
Lah ban kdew hangne, ba na ki san ngut ki MLA Congress kiba shah sospon ha ka party na ka daw ba ki leit ban kyrshan ïa ka sorkar MDA, arngut na ki, ki lah ban poi sha ka UDP, katba lai ngut pat kiwei ki dang don ha ka jingïakhun la kin poi sha ka NPP lane kin dang neh ha kajuh ka party lane kin leit sha kiwei pat ki party.
Hynrei haba ïadei bad katei ka phang, katei ka MLA ka kren shai ba kan sngap beit ïa ka sur jong ki nongkyrshan kiba dei ki nongpynjop, kano ka party kaba ki jied, sha kata ka party kan leit ban ïakhun ha ka elekshon ban wan.
Ha shwa kane, ka la ong ruh ba ka Congress ka khlem pat pyllait ïa ki, hynrei ki la pyrshang pynban ban teh kyndon. “Hynrei kane kam pher namarkata hi kaba ki lah ban leh, tangba ngi don ha ka synshar paidbah ha kaba ki MLA ba shah sospon ki lah ban jied hato la kin don sah ha ka jingshah sospon. Tangba halor ka jingphriang ki khubor ba ngin leit shane shatai, ngi ieh ha ki nongkyrshan namar baroh san ngut ki MLA ngi don ka jingïasyllok lang bad la ki nongkyrshan,” ka la bynrap biang.
Haba kren pat halor ka jingsospon kaba haduh lai snem shiteng, ka Kong Ampareen ka la ong, “Ngin ap shwa, hadien lai snem shiteng ngi lah ban pynïasoh biang sha ka Congress. Hynrei namar hapdeng ka don noh ka elekshon kumta shaei ngin leit, kadei ka mon jongngi ban jied.”
Katkum ka jingong jong ka, mynta ki don phra bnai shwa ka elekshon, kumta namar ha Congress la don lypa ki kyrtong kumta kim lah shuh ban leit phai ne pan tiket. Kumta, lada ki nongkyrshan hi ki dang kwah ïa ki ban bteng kum ki nongmihkhmat, da lei lei ruh kin ym pat shong iing satia.
