Shillong, Jymmang, 17: Ka tnat Animal Husbandry and Veterinary (AH&Vety) jong ka Sorkar Jylla ha ka sngi Baar ka la kyntait war halor ka jingkynnoh ba la mih ha ki lad pathai khubor ba ka don ka jingshah knieh jubor ka khyrdop ba peit ïa ki masi ba wanrah nabar ka jylla kaba don ha Umling, Ribhoi District.
Katkum u kyrwoh ba la phah da u Director ka Animal Husbandry and Veterinary, ula ong, ‘ba ki doktor ka Veterinary kiba don ha kane ka khyrdop ha Byrnihat, ki ïathuh, ba ki hap phet na katei ka jaka namar ka jingshngaiñ jong ki ïalade; hynrei ha ka miet kaba bud, ki la bteng biang la ka kam da ka jingai jingïada jong ki bor synshar ka Ribhoi District bad ki kyntait ruh ba ki la phet noh na kane ka jaka namarba ki don da kiwei pat ki briew kiba la knieh jubor noh ïa ka kam jong ki.”
U Director u la ong ruh ba ki doktor ka Veterinary ki la kyntait ba ka don ka jinglum pisa jubor ha kane ka jaka ba peit ïa ki masi ba wanrah nabar ka jylla.
U Director u la ong, “lada don kino kino ki briew ki don ïa ki sakhi sabut kiba biang halor ki jingleh be-aiñ jong ki nongtrei ka tnat kiba don ha kane ka khyrdop ki lah ban wan pyntip pyntip sha ka ophis.”
“Kane ka khyrdop ka dei kaba la buh ban peit ïa ka koit ka khiah jong ki masi, ïa ki kot ki sla bad ban khanglad ïa ka jingshalan tuh ïa ki masi bad ki muid sha ka ri Bangladesh,” ong u Director.
