Shillong, Jymmang 17: Ka Seng A.chik Holistic Awakening Movement (AHAM), ka la byrngem ban leit sha ïingbishar lada ka sorkar kam sngap ïa ka jingdawa ban weng noh shuwa ïa ka jingpynbeit pud bad ka Assam, khamtam ïa ka jingpyngngat ïa ki artylli ki Shnong ha West Khasi Hills sha Assam.
Ka Bernita Marak, Legal Adviser jong ka Seng haba ïakren bad ki nongthoh khubor ha Shillong Press Club mynta ka sngi, ka la ïathuh ba ki nongïalam jong ka Seng ki la leit ban ïakynduh ïa ki paidbah nongshongshnong jong ka Malchapara bad Salbari bad ki paidbah na kine ki Shnong ba shong bun ki paid Garo, ki la ïathuh ba kim kwah satia ban leit sha Assam, namar baroh shi katta ki hap ha Meghalaya bad baroh ki jingïarap ki ïoh beit na Meghalaya. Nangta ki ju thep vote ruh ha Meghalaya.
“Ki paidbah ki la ïathuh ïa ngi ba ki dkhot jong ka Regional Committee kim shym la khot ïa ki Nokma ne ki paidbah ban ïasyllok halor kane ka jingrah jubor sha Assam, hynrei ki la shu leh jubor, khlem ka jingtip jong ki paidbah”, la ong ka Bernita.
Shuh shuh kane ka Samla Nongsaid aiñ, ka la ong ba katkum ka Notification haduh u snem 1951, la pynpaw ba kine ki Shnong ki hap ha ki bynta jong ka Khasi Hills bad ym shym la pynpaw eiei ba kidei ki bynta jong ka Assam.
“Ki paidbah jong kine ki Shnong da lei lei kin nym leit sha ka Assam, namar ba kidei ki nong Meghalaya”, la ong kane Nongaibuit jong ka Assam.
Ka la dawa ba ka sorkar kadei ban pynlong da ka jingïathep vote ne ka referendum ban ïohi katno ngut ki paidbah kiba kwah ban leit sha Assam bad katno ngut pat kiba kwah ban don ha Meghalaya. Ka la ong ba dei hangne ba ka sorkar kan sa ithuh shisha haduh katno ki paidbah ki pyrshah ïa kane ka jingleh jong ka ban pynhap ïa kine ki artylli ki Shnong sha Assam kaba long pyrshah ïa ka mon jong ki.
Haba la kylli kaei kaba ka Seng kan leh lada jia ba ka sorkar kam sngap ïa kane ka jingdawa jong ki,. Ka Bernita ka la ong ba borabor hi haba ka sorkar kam lah ban ai ka jingbishar ne kam sngap ïa ka jingdawa, ka lad ka lynti ka long ban leit beit sha ïingbishar jong ka ri India, ka Supreme Court.
