Shillong, Jymmang 17 : U Nongïalam ka Liang Pyrshah u Dr Mukul Sangma u la kyntu ïa ki paidbah jongka jylla ba kin ai jingsneng ïa ki MLA kiba bamsap da ka bainong kaba tyngeh ha ka election MLA 2023.
“ Ka buit ban ai jingsneng ïa kine ki MLA bamsap ka long ban ailad ba kin theh puk puk ha ka election bad pynrem pat ïa ki ha kaba kut. Ai jingsneng ïa ki ba kin sngewthuh bad long ka nuksa bad jingsneng ïa kiwei ba donkam ka jingkylla bamut ban shakri ïa ki paidbah bad ka jaidbynriew da kaba trei hok bad pyndep ïa ki jingkular namar tang ka pisa kam treikam satia” ong u Dr Mukul.
U la ong “ Lada ngi ailad ïa kine ki MLA bamsap ban jop ïa ka election da ka pisa ka jylla kan nangjot nangjot. Ki paidbah ki dei ban sngewthuh ba kane ka jingpyndonkam da ka pisa ban thied ïa ka hok jongki ka ap ka jingma ïa ka jylla bad ïa ka pateng ban wan namar lada kine kiba bamsap ki jop da ka pisa kin ïai bteng bad ïai leh ïa ki kam bamsap ha ka jylla bad kin leh kumjuh shi kumjuh man ka san snem. Kin wan bad thied ïa ki vote da ka pisa bad hadien ka election lada ki jop kin ïaleh ban kamai ban khyllie ïa kaei kaba ki la pynlut ha ka por election bad kin dang ïai bamsap shuh shuh bad kane kan ktah jur ïa ka jylla bad ïa ki paidbah”.
U la banjur ïa ki nong trei ba shitrhem ka AITC ba kin trei borbah ban pynsngewthuh ïa ki paidbah halor kane ba kin nang bad sngewthuh kiba kum kino ki nongïalam ki donkam ban jied la ka dei na ka AITC ne na kano kano ka party ruh ym ban jied ïa kito kiba leh arsap, bamsap bad riehtngen ha kata ka syrngiew ba ieit jaidbynriew.
“ Ngam kwah ban jer kyrteng hynrei ki don ki MLA kiba pyrkhat ba lyngba ka saiñ pyrthei kin pynlong kum ka atiar ban pynkhraw ïa ka kamai kajih jongki da kaba tuh bad lute ïa ka jylla bad ïa ki hok jong ki paidbah” ong u Dr Mukul.
U la ong ba kane kam long satia ki dak ki shin kiba itynnad. “ Kumta ngi dei ban sngewthuh ïa kino ki riew shim kabu ne ki khwan myntoi shimet namar kine ki dei kiba pynïapait ïapra ruh ïa ka imlang ka sahlang. Namar lada ïaka sorkar la thaw da kiba kum kine ki briew da ka jingthmu ban wan ha ka bor ban ïoh lute pat na ka sorkar jylla, ym tip shuh shano ka lawei jongka jylla kan poi namar ka jingkiew kan long tang ma ki katba ki paidbah kin dang iap thngan”.
