Duh ei ki lai ngut ïa ka jingim, ym pat lah ai jingkheiñ ka Sorkar halor ka jingjulor

Husiar, wat ym kheiñ shngaiñ: Kyrmen Shylla

0

Shillong, Jymmang 17 : Haduh lai ngut ki nongshong shnong ka jylla, kynthup ïa ki arngut na East Khasi Hills bad iwei pat na Ri Bhoi District ki la duhei ia la ka jingim na ka jingwan syllad kynsan ki bor ka marïang ha ka 13tarik mynta u bnai.
Haba pyntip ïa kane, u Myntri ka tnad Revenue and Disaster Management, Bah Kyrmen Shylla, u ong ba nalor ka jingduh ïa ki mynsiem briew, ka la don ruh ka jingjulor kaba khraw la ka long ha ki lynti syngkien, ki iing ki sem, ki jingri jingdub bad khamtam wat ki jingthung jingtep ha kylleng ki bynta jong ka jylla.
“Ngi sngewsih ban pyntip ba ki distrik kiba shah ktah jur eh dei ka East Khasi Hills bad ka Ri Bhoi District ha kine ki arsngi haduh ba lai ngut ki la duh ei ïa la ka jingim,” ong u Myntri haba kren bad ki lad pathai khubor.
La ïathuh ruh ba ki don ki jaka ba ki mar rep ruh ki la shah pynjulor lut na ka jingther u lapbah bad ka jingshlei um ki jaka rep. Ym tang katta, ha ka 13tarik lei lei haduh 13 tylli ki longiing ki lashah pynjulor tang ha East Khasi Hills na ka jingther khlem sangeh jong u slap. Nalorkine, ka la don ruh ka jingtwa biang ha riat Rngaiñ kaba la pynlong ïa ar tylli ki kali ban julor jur.
Da kaba pyntip ba ka sorkar ruh ka la pynkhreh ia ki lad jingïarap na ka bynta kitei ki longiing ba sngewsih kumjuh na bynta kito kiba kynduh ïa katei ka jingshah pynjulor ha ki bor ka mariang, u Myntri u la kyntu ruh ïa ki nongshong shnong ba ki dei ban long kiba husiar bad peitngor namar ka jinglong jingman ki bor ka mariang ha kum kane ka por ki shu wan kynsan kynsan beit.
Ha shwa kane, u Myntri u la kyntu ruh ïa ki tnad bapher bapher jong ka sorkar jylla kiba dei ban peit halor kitei ki jingjia ba ki dei ban long kiba trei shitom khnang ba ki paidbah kin ïoh ïa ki jingïarap ha ka por kaba biang.
Katkum ka jingong jong u Myntri, jan man u snem ka jylla ka ju duh ei ïa ki mynsiem briew tang na ka daw ka jingwan lyngshop ki bor mariang. “Na kane ka daw nga kyntu ba phin long barabor kiba peitngor bad to long ruh kiba kloi ban ïarap lang ïa ki para briew haba don ki jingjia kiba kyrkieh khlem da ap katban da wan ki bor sorkar,” bynrap biang u Myntri.

Leave A Reply

Your email address will not be published.