Wanrah ka JHADC ïa ka Resolution ban dawa beit na ka President halor ka kam tih dewïong

Jowai, Jylliew 24: Ka Jaiñtia Hills Autonomous District Council (JHADC) mynta ka sngi Balang 24 tarik kala wanrah ïa ka Resolution kaba long kaba nyngkong eh hapoh ka Dorbar ba kyrpang (Special Session) ban dawa na ka President halor ka jingpynkylla ïa ki kyndon aiñ kiba ïadei bad ka kam tih dewïong.
Kane ka kyndon aiñ Resolution kaba la tip kum ka ‘Mines and Minerals (Development and Regulation) Act, 1957 The Mineral Concession Rules, 1960 The Coal Mines (Special Provision) Act, 2015’.
Hashwa ban ïatia ïa katei ka Resolution bala wanrah da u CEM ka JHADC ma Thombor Shiwat da kaba kdew ïa ki kyndon jong ka jingpynkylla ïa ki kyndon aiñ hapoh ka Para 12A(b) jong ka Sixth Schedule ïa kaba la ai bor da ka President ïa ki Autonomous District Council ban thaw ki kyndon aiñ.
Kane ka aiñ kala kdew ruh ïa ka rukom tih Dewïong ha ki jaka hapoh ka Sixth Schedule ha ki lai tylli ki bynta kata ka Tier I ïa ki riew shimet/ki kur bad ka longiing); Ka Tier II ïa ki (medium-scale cooperative/partnership operations) bad ka Tier III (large-scale corporate operations).
Kiba bun ki MDC khamtam naka liang pyrshah kila ïashim bynta ban ïakren ïa kane ka Resolution, da kaba ai khublei ïa ka EC kaba la shim khia ban thaw ïa kane ka kyndon aiñ ban shah noh ïa ka jingtih dewïong hapoh ka Ri-Lum Jaiñtia kumba long ha ki por mynshwa.
Na ka liang u nongïalam ka liang pyrshah u ma A.A. Shullai ula kdew ïa ki katto katne tylli ki jingpynbeit halor ki bynta jong kane ka Resolution bad hadien ka jingïapynbeit ïa ki jingdonkam kiba ïadei bad ka jingheh ka jaka tih dewïong naduh 0.5 hectare, nalor kiwei de ki kyntien kiba dei ban weng noh, Hadien ka jingshong Dorbar biang ha ka por jaitmiet la rai ban pdiang ïa ka.
U CEM ma Thombor Shiwat ula ong kane ka jingshim rai jong ka JHADC ka long hadien ba la ïohi ïa ka jingdonkam ba kongsan kaba la ktah ïa ka ophis ha kaba ïadei bad ka jingïoh bhah (royalty) ka Council na u Dewïong bad ka jingeh jong ki nongshong shnong ka Ri-Lum Jaiñtia bad kiwei de ki seng kiba la ud la nam ban ïoh jingïarap na ka Council.
Kum ka Council kaba la shah pynkup bor da ka Riti Synshar kumta ha kane ka kynti kaba dei ka sien ba nyngkong kala shim ïa kane ka sienjam kaba donkam ïa ki nongshong shnong ban wanrah ïa kane ka Resolution katkum ki kyndon aiñ bad kaba sah mynta ka long sa tang ka sorkar lyngba ka President kan leh ïa kaba donkam.
Kum ka Council ka kyrmen skhem ba ka sorkar pdeng kan shimkhia mardor ïa kane bad lada don kino kino ki jingpynbeit ha kaba ïadei bad ki kyndon jong kane ka Resolution, ka Council ka kloi ban leh mardor khnang ba ki paidbah baroh kin ïoh kloi ban sdang ïa ka kam tih dewïong hapoh ka Ri-Lum Jaiñtia kumba long ha ki por mynshwa.