ïaphylliew jingmut ki tnad sorkar bad ka tnad pathai khubor sorkar ban pynkhlaiñ jingpynsaphriang jingtip

Shillong, Jylliew 24 : Ka jingïalang jong ka Inter-Media Publicity Coordination Committee (IMPCC) kaba la pynlong da ka Press Information Bureau (PIB), Shillong bad kaba la pynlong ha ka Akashvani Shillong, ka la long mynta ka sngi ban pynkhlaiñ ïa ka jingïatreilang hapdeng ki tnad sorkar, ki lad pathai khubor sorkar bad ki kynhun kiba trei ha ki kam paidbah.
Ha kane ka jingïalang la ïadonlang ki nongmihkhmat na ka Akashvani Shillong, Doordarshan Kendra Shillong, ka Tnad Information and Public Relations (DIPR), ka tnad Census, ka India Meteorological Department (IMD), ka Tnad Telecom, ka North East Centre for Technology Application and Reach (NECTAR), ka National Institute of Fashion Technology (NIFT) Shillong, North Eastern Institute of Ayurveda & Homoeopathy (NEIAH), North Eastern Service, ka tnad Soil & Water Conservation , Spices Board, Central Bureau of Communication (CBC) Shillong bad kiwei kiwei ki kynhun kiba don bynta ha kane ka kam.
Ki ophisar na ka Akashvani Shillong ki la pdiang sngewbha ïa ki nongïashim bynta bad ki la ban jur ïa ka jingdonkam jong ka jingïatreilang ban ai jingtip ha kaba kyntiew ïa ka jingai jingtip sha ki paidbah shaphang ki prokram jong ka sorkar.
Ha kane ka jingïalang, ki kynhun kiba ïashim bynta ki la ïasam ïa ki jingtip shaphang ki kam jong ki, ki sienjam pynsaphriang jingtip bad ki jingeh ha ka jingai jingtip, khamtam ha kaba pynpoi ïa ki jingtip sha ki nongshong shnong ha ki jaka ba jngai bad ki jaka nongkyndong. Ka tnad Census ka la pynshai ïa ki dkhot halor ki jingpynkhreh na ka bynta ka kam khana samari ka ban sa wan, katba ka NIFT Shillong ka la batai ïa ki prokram ki ban sa wan, kynthup ïa ki jingïalang kiba ïadei bad ki samla pule bad ka jingrakhe ïa ka National Handloom Day.
Ki nongmihkhmat na ka Doordarshan Kendra Shillong ki la batai ïa ki khubor jong ka, ki jingjia ba
mynta bad ki sienjam ba ïadei bad ki prokram ba kyrpang, kynthup ïa ka jingkiew jong ka ha ka kam digital bad social media. Ha kane ka jingïalang la ïamir jingmut ruh shaphang ki sienjam ai jingtip ba thymmai kum ka prokram “Creators Corner” jong ka Doordarshan, kaba ïaleh ban
pynïasoh lang bad ki nongpynmih prokram ha ka thaiñ ha kaba pynmih ïa ki prokram kiba ïadei bad ka roi ka par na ka bynta ka jingpynsaphriang jingtip kaba kham ïar.
Ka India Meteorological Department (IMD) ka la pyni ïa ki jingai jingshakri jong ka ban ai jingtip ïa ka jinglong ka suiñbneng, ki rukom ai jingmaham bad ki rynsan ai jingtip sha ki paidbah, da kaba ban jur ïa ka jingdonkam ban don ka jingsngewthuh kham bha ïa ki jingai jingmut halor ka jinglong ka suiñbneng bad ki rukom ai jingmaham kloi lyngba ki social media. Ka NECTAR ka la ban jur ïa ki sienjam jong ka kiba la pynïaid da ka teknoloji kiba kyrshan ïa ka roi ka par bad ka kamai kajih kaba ïaineh ha kylleng ka thaiñ shatei lam mihngi bad ka la ban jur ïa ka jingdonkam jong ka lad ai jingtip kaba thikna ban kyntiew ïa ka jingsngewthuh jong ki paidbah shaphang ki
jingarap ba ïadei bad ka roi ka par.
Ka tnad Soil & Water Conservation ka la ïasam ïa ki jingtip halor ka jingkyntiew ïa ki jingdon jingem, hadien ka jingot bad kiwei kiwei ki skhim kiba ïadei bad ki nongrep, katba ki nongmihkhmat na ka tnad Telecom ki la ai jingtip ïa ki nongïashim bynta shaphang ki sienjam ban pynïasoh bad ki campaign ai jinghikai hapoh ka rynsan Sanchar Saathi kaba thmu ban kyntiew ïa ki jingai jingshakri ha ka kam telecom kiba shngaiñ. Ki nongïashim bynta ki la ïakren ruh shaphang ki jingeh ha ka jingpynsaphriang ïa ki jingtip ha ki jaka nongkyndong bad ki la ban
jur ïa ka jingdonkam ban don ka jingïatreilang kaba kham bha hapdeng ki tnad bad ki lad pathai khubor.
Ka jingïalang ka la kut da ka jingïamynjur lang ban pynkhlaiñ ïa ka jingïatreilang, ban kyntiew ïa
ka jingpyndonkam ïa ki rynsan tynrai bad ki lad digital, bad ban ïasam ïa ki jingtip da kaba shim khia ban pynthikna ïa ka jingpynsngewthuh paidbah kaba kham ïar shaphang ki skhim jong ka sorkar, ki jingai jingshakri bad ki sienjam ba ïadei bad ka roi ka par.
Ka IMPCC, kaba la sdang da ka Tnad Information & Broadcasting, ka long kum ka rynsan ban ïatreilang hapdeng ki tnad sorkar, ki kynhun kiba trei ha ki kam paidbah bad ki lad pathai khubor ban pynsuk ïa ka jingpynsaphriang ïa ki jingtip kiba paka halor ki polisi, ki prokram bad ki sienjam jong ka sorkar.