Wan wad jingtip ka Myntri Sorkar pdeng halor halor ki skhim ka koit ka khiah

Shillong, Nailar 25 (PIB): Ka Myntri Khynnah ba dei khmih ia ka tnat ka koit ka khiah, ka Dr. Bharati Pravin Pawar ka la poi ha nongbah Shillong mynta ka sngi ban peit ïa ka rukom treikam ka tnat ka koit ka khiah bad ruh ïa ki skhim ba ïadei bad ka koit ka khiah ba bei tyngka ka Sorkar Pdeng ha Meghalaya.
Kum shi bynta kane ka jingwan sha Meghalaya, ka Dr. Bharati Pravin Pawar ka la leit peit ruh ïa ka NEIGRIHMS. Ka la pynlong ruh ka jingïalang bad ki ophisar bad ki nongtrei jong ka NEIGRIHMS. Hadien kane, ka la pynlong ïa ka jingïalang ha ka jingdon ryngkat ka Myntri ba dei khmih ia ka tnat ka koit ka khiah jong ka Sorkar Meghalaya, ka Dr M Ampareen Lyngdoh bad ruh ki ophisar ka tnat ka koit ka khiah.
Ha ka jingiakren bad ki lad pathai khubor hadien kine ki jingialang, ka Dr Pawar ka la ong ba ha kine ki khyndai snem ba la dep, ka Sorkar ka la pyrshang ban pynkhlaiñ ïa ki lad ai jingsumar. Ka la ong, “Ka jingthmu jong u Myntri Rangbah Duh ka dei ban pynkhlain ia baroh ki lad ai jingsumar lyngba ki skhim ka Sorkar Pdeng.” Naduh u snem 2015, la mang tyngka shuh shuh ïa ka NEIGRIHMS ba kan tei ïa ka medical college, pynbun ia ki MBBS seat bad pynkhlain ia ka nursing college. Ka la iathuh ruh ba ha une u snem ban wan yn pynbun shuh shuh sa 50 tylli ki MBBS seat ha kane ka jaka pule bad kumta kin don 100 ngut ki samla pule MBBS. “Man u snem ngi pynbiang pisa hapoh ki bynta bapher bapher ban pynkhlaiñ ïa ka NEIGRIHMS. Ha une u snem ba la dep, ka jingmang tyngka ka long 489 klur bad mynta u snem, ka jingmang tyngka ka long 528 klur.” Ka la ïaroh ia ki kam jong kane ka jaka pule ban pynkhlain ia ka radio therapy treatment unit bad kiwei kiwei ki jingai jingshakri. Ka la ong ruh ba ki jingpyrshang jong ka Sorkar Pdeng ki long ban pynkhlain ia kane ka jaka pule.
Ha ka jingkren shaphang ka jingpyntreikam ïa ki skhim lyngba ka National Health Mission, ka Dr Pawar ka la ong ba lyngba ka NHM, ka pisa ba la pynbiang ïa ka Meghalaya mynta u snem ka long kumba 600 klur ha ka jingphiah kaba 90% na ka Sorkar Pdeng bad 10% na ka Sorkar Jylla. Ka la iathuh ruh ba hapoh ka Emergency Covid Relief Package-1, ka jingmang tyngka ba la ai ban tehlakam ïa ka khlam ka long T 25 klur ia ka Meghalaya bad hapoh ka Emergency Covid Relief Package-2 la ai T 117 klur. Hapoh ka 15th Finance Commission, ka Sorkar Pdeng ka pynbiang T 150 klur ia ka Meghalaya ban pynkhlain ia ki Sub Centre bad ki Health and Wellness Centre. “Ngi dei ban peit bniah ia ka jingpynkhreh lypa bad ka jingiada kumba thmu u Myntri Rangbah Duh khnang ba ngin long kiba la khreh ia kano kano ka khlam kaba lah ban wan,” ka la ong.
Ha ka jingkren shaphang ka Pradhan Mantri Ayushman Bharat Health Infrastructure Mission, ka Myntri ka la ong ba lyngba kane ka skhim, ka Sorkar ka peit bniah ia ka jingpynkhlain ïa ki lad ai jingsumar. Ka la ong ruh ba ha ka jingmang tyngka kumba T. 64, 000 klur ia ka ri baroh kawei, kumba T. 150 klur ka dei kaba la buh na ka bynta ka Meghalaya ha kine ki 4 snem ban wan.
Hapoh ka Ayushman Bharat Digital Mission (ABDM) la shna kumba san lak tylli ki ID. “Kane ka iarap ia ki nongpang ba kin ioh ban iakynduh ia ki doctor, ba kin ioh ia ki kaiphod na ki lab lyngba ki lad digital bad kane ka iarap bha ia nongpang bad ki doctor ba kin shim ia ki rai kiba dei,” ka la ong
Ha ka Pradhan Mantri Jan Aarogya Yojana (PMJAY) Meghalaya, ki don kumba 18 lak ngut ki briew kiba ioh jingmyntoi bad la dep sam kumba 5 lak tylli ki card. Ka myntri ka la kyntu ia baroh kiba dei ban ioh ia kane ba kin wan shakhmat ban ioh jingmyntoi na ka PMJAY, kaba long ka skhim insurance kaba heh tam kaba ai jingiarap haduh T. 5 lakh ia man ka longiing kaba duk ha ka shi snem na ka bynta ka jingthiah hospital.
Haba kren shaphang ki Health Health & Wellness centre ka Myntri ka la ong, “Mynta jan 470 tylli ki Health & Wellness centre ki treikam ha jylla Meghalaya. Ka Health and Wellness centre kadei ka jingthmu ha kaba ngi phaikhmat ban leh ia ka jingeksamin bad ai ruh ia ka jingsumar. Ha ka Health & Wellness centre ngi leh ruh ia ka jingeksamin ia ka jingpang hypertension, jingpang shini bad ki jingpang cancer kum ka oral bad cervical cancer.”
Ka Myntri ka la ai jingïaroh ia ka sienjam jong ka sorkar Meghalaya ha ka jingpyntreikam ïa ka tele-consultation ha ka Jylla haduh mynta. La shna ia ka Regional Cancer Centre ha NEIGRIHMS bad ka jingphaikhmat kalong ban ai jingsumar ia ki briew kiba pang cancer, ka la bynrap. Haba iaroh ia ki sienjam jong ki nongtrei ASHA, ka Dr Pawar ka la ong kumba 7000 ngut ki nongtrei ASHA ki ai jingshakri ha kaba ïadei bad ki lad jingsumar sha ki jaka kiba jynjar ban poi jong ka jylla Meghalaya. Ka Myntri ka la ïaroh ïa ki sienjam jong ka sorkar jylla ban pynduna ka jingkhlad ki khunlung bad ki longkmie kiba dang pun khun lyngba ki lad bapher bapher.