Wan jngoh u Myntri sorkar pdeng ban buddien ïa ki kam pynroi ha Ri-Bhoi

Nongpoh, Risaw 01: U Myntri Khynnah ka sorkar pdeng, ba dei peit ïa ka tnad Rural Development bad Steel u Faggan Singh Kulaste mynta ka sngi u la wan ban iuh kjat ha Ri Bhoi District na ka bynta ban buddien halor ki jingpyntreikam ïa ki kam pynroi ha kane ka District kaba la shah jied kum kawei na ka ‘Aspirational District’ haka jylla Meghalaya bad ruh kaba la rung haka kyrdan Top 5 napdeng ki 117 tylli ki District hapoh ka ri kiba la shah jied kum kita ki Aspirational District.
Ha kane ka jingwan iuh kjat une u myntri khynnah ka sorkar pdeng ïa ka Ri Bhoi District, la pynlong ïa ka jingïakynduh lang ki ophisar sorkar bapher bapher na Ri Bhoi ha Conference Hall ka ophis u Deputy Commissioner ka Ri Bhoi, naka bynta ban buddien ïa ki jingpyntreikam ïa ki skhim pynroi bapher bapher kiba dei katkum ka jingmang ïa ki District ba la ithuh kum kata ka Aspirational District.
Ha kane kajuh ka sngi, hadien ka jingwad bñiah ïa ki kam pynroi ba la pyntreikam ïa ha kane ka District kum kata ka Aspirational District, une u Myntri Khynnah ka sorkar pdeng, u la ioh lad ruh ban leit jurip ïa ka Aganwadi Centre ha Byrnihat, Byrnihat PHC bad kumjuh ruh u la leit ban ïa kynduh ïa ka kynhun SHG kiba dei ki Longkmie haka thaiñ Byrnihat.
Haba kren pat sha ki Nongthoh Khubor hadien kane ka jingïalang, u Faggan Singh Kulaste u la pynpaw, ïa ka jingkmen kaba khraw ban iohlad ban wan buddien ïa ki kam pynroi kiba la mang lyngba ka ADP kaba dei kawei na ki prokram ba la pyntrei lyngba ka jingiohi jngai jong u Myntri Rangbah Duh ka Ri u Narendra Modi, ha kaba u la pynpaw ba u dap da ka jingsngewhun halor ka jingbatai da ki ophisar ha kaba ïa dei bad ka jingpyntreikam ïa ki skhim pynroi lyngba ki tnad treikam bapher bapher hapoh Ri Bhoi District.
U la pynpaw ruh, ba watla ki dang don ki kam kiba dang hap ban pynsted bad ban hap khmieh bñiah kum ha ka tnad Horticulture, Education bad PHE hynrei u don ka jingkyrmen ba lyngba ka jingtreishitom jong baroh ki ophisar khamtam na ki bor ba dei peit ia ka district ha ka jinglamkhmat da u Deputy Commissioner ka district.