La pynkut noh ïa ka Rashtriya Poshan Maah ha shnong Jalaphet Bri-Sutnga, EJHD

Khliehriat Risaw 01: Ïa ka prokram ba kyrpang kaba la pynlong mynta baroh shi bnai, ka Rashtriya Poshan Maah, la pynkut noh mynta ka sngi ha shnong Jalaphet Bri Sutnga ïa kane ka prokram la pynlong da ka ophis jong ka District Programme Officer, ICDS (cell), East Jaiñtia Hills District ha ryngkat ka jingïatreilang bad kiwei kiwei ruh ki tnat sorkar bad ka phang pdeng jong kane ka prokram ka dei ka ‘Mahila Aur Swasthiya” bad “Baccha Aur Shiksha”
Haba kren kum u kongsan, u Deputy Commissioner ka East Jaiñtia Hills District, u Abhilash Banarwal, IAS u la ai ka jingiaroh bad ai khublei ïa ka tnat ICDS lem bad ka kynhun kiba la lah ban pynlong ïa kane ka prokram kaba jop haduh kaba kut, ha kaba ki kynhun ki la ïoh ruh ban pynlong ïa ki prokram bapher bapher na ka bynta ki khynnah bad ki khynnah ruh ki la ioh ïa ki jingbam kiba tei ïa ka met lyngba ki Agamwadi Centre, kumjuh ruh kito ki longkmie kiba ar met, u Deputy Commissioner u la ong ruh ba hapoh kane ka prokram la ïoh ruh ban pynlong ïa ka VHNDs, kumjuh ruh la pynkup burom ïa kito kiba la ai injek bad kiwei kiwei ki kam ruh la pyndep, u la kyrpad ïa ki Waheh Shnong bad ki dkhot shnong ba ki dei ban leit mih man la ka por sha ki Aganwadi Centre khnang ban dup sngewthuh ba ki Aganwadi Centre ki dei ban bit ban biang.
U la pynsngew ruh, ba ïa ki tiar pule jong ki khynnah rit (Learning Kits) la dep ban ai sha ki san phew tylli ki Aganwadi Centre kiba don hapoh ka district bad ïa ki Model Aganwadi Centre yn sa jied na kitei ki Centre ha kaba yn bishar bniah bha ïa ka rukom treikam ki centre.
Ka Incharge jong ka Child Development Project Officer (CDPO), ka kong D.Iakai, ka la batai halor ka prokram ba ai ïa ki jingbam kiba tei met ïa ki khynnah kiba hapoh ka 6 snem kyrta bad kumjuh ruh sha kito ki longkmie kiba ar met, ka la kren ruh halor ka jingdonkam ban ai buiñ ïa ki khun ha ki hynriew bnai, katei ka Incharge ka la ong ruh ïa baroh ki kynthei kiba poi sha kane ka prokram ba ki dei ban don ka jingïatreilang bad ki ASHA ha kaba ai jingpynshai sha ki nongshong shnong ha kaba ïadei bad ka phang ban bam ïa ki jait jingbam kiba tei ïa ka met.
Kiba la ai jingkren ki kynthup ruh u District Medical and Health Officer, East Jaiñtia Hills District, u Dr Dominic Shylla, ka District Agriculture Officer, East Jaiñtia Hills District, ka kong M.J.Shylla bad u District Child Protection Officer, East Jaiñtia Hills District, u bah T.Kyndiah bad kiwei kiwei.
Ha kane ka prokram, u Deputy Commissioner, u la sam ruh ïa ki khusnam sha kito ki longkmie kiba ju long tista ha kaba phah check up bad kiba tista ha kaba ai injek bad kiba ju long tista ban wan sha ki Aganwadi Centre, ha kane hi ka sngi la ai khusnam ruh sha kito ki khynnah kiba ju wan tista sha ki skul Aganwadi bad ki khynnah kiba heh ba san ha ki Aganwadi Wadi Centre.
Kiba la ïa don ryngkat lang ha kane ka prokram ki kynthup ruh ka District Agriculture Officer, East Jaiñtia Hills District, ka kong M.J. Shylla, ka Child Development Project Officer East Jaiñtia Hills District, ka kong D.Iakai, u Waheh shnong Jalaphet Bri Sutnga, u bah R.Dkhar bad kiwei kiwei.