Shillong, Nohprah 21 : Ka Sohra International Half Marathon, ka la long kaba jop, da ka jing ïa mih paidbah jong ki nongïamareh jong ka jylla bad kumjuh da ka jingwan ban ïashim bynta wat da ki nongïamareh kiba dei na shabar kane ka jylla bad ki katto katne ngut ki nongï a mareh ba dei na kiwei pat ki ri bad kane ka jingïakob la lah ha kaban pynlong ïa ka hynne ka sngi Balang jong ka taïew ka 21 tarik u Nohprah 2022.
Ïa kane ka jingïakob la phiah ha ka kyrdan ïakhun jong ka Elite kynthei bad shynrang, nangta Meghalaya PRC kynthei bad shynrang, 10K kynthei bad shynrang bad ruh ka Run for Fun 5K kynthei bad shynrang bad haba kheiñ kyllum ki nongïashim bynta ki long shynrang 355, kynthei 137 bad baroh kiba la poi ban ïashim bynta sha kane ka jingïakob mareh ha baroh ki kyrdan ïakhun ki long 492.
Haba phai sha ka resol jong ka 21 K Elite jong ki shynrang u nongjop ha kane ka jingïakob dei u Adisu Bekele Abebe ka ri Ethiopia uba la pyndep ïa ka thong ha ka 1:02:21, ba wan ba-ar dei u Tirtha Pun ka India uba la pyndep ïa ka thong ha ka 1:04:19, ba wan ba-lai dei u Too Cheruiyot ka Kenya hadien ba u la pyndep ïa ka thong ha ka 1:05:01 hrs.
Katba ki nong ïamareh ba la wan ban bat ïa ka kyrdan kaba saw bad ba san ki long u Kemei Elijah Kipruto ka Kenya bad u K. Bikram Meitei ka India kiba la pyndep ïa ka thong ha ka 01:05:33 bad 01:05:41.
Haba phai pat sha ka ïakob mareh kaba 21 K jong ki kynthei, ka nongjop ha kane ka kynti ba mynta ka dei ka Richa Bhaduria ka India kaba la pyndep ïa ka thong ha ka 1:13:22, ba wan ba-ar dei ka Christine Kambua Muyanga ka Kenya kaba la pyndep ïa ka thong ha ka 1:14:29, ba wan ba-lai dei ka Arpita Saini ka India kaba la pyndep ïa ka thong ha ka 1:20:07, katba ki thei ïa mareh ba bat ïa ka kyrdan kaba saw bad kaba san ki long Marqueenless Ramsiej bad ka Susan Chebet na Meghalaya (India) hadien ba ki la lah ban pyndep ïa ka thong ha ka 1:28:07 bad 1:33:56.
Ka resol na ka kyrdan ïakhun jong ka PRC Meghalaya, na ka liang ki shynrnag u nong ïa mareh ba la wan ban bat ïa ka kyrdan ba nyngkong dei u Skhemlang Suba uba la pyndep ïa ka thong ha ka 01:08:29, ba wan ba-ar dei u Anil Guram uba la pyndep ïa ka thong ha ka 01:08:35 ba ba wan ba-lai dei u Adhrishya uba la pyndep ïa ka thong ha ka 01:08:57.
Na ka liang ki kynthei ka nongjop ha kane ka kyrdan ïakhun dei Kyntimon Marweiñ kaba la lah ban pyndep ïa ka thong ha ka 01:22:20, ba wan ba-ar dei ka Darishisha Iangjuh kaba la lah ban pyndep ïa ka thong ha ka 01:26:56 bad ba wan ba-lai dei ka Daplin Wahlang kaba la pyndep ïa ka thong ha ka 01:29:03.
Haba phai pat sha ka ïakob mareh jong ka 10K jong ki shynrang, u nongïamareh ba la wan ban bat ïa ka kyrdan ba nyngkong dei u Bah Badonsing Tham ka Meghalaya, uba la lah ban pyndep ïa ka thong ha ka 36:57 minit, ba wan ba-ar dei u Pynshngainlang Dkhar uba la pyndep ïa ka thong ha ka 39:03 minit, ba wan ba-lai dei u Kedrick Kharpo ruba la pyndep ïa thong ha ka 41:22 minit, bad ki nongïamareh bala bat ïa ka kyrdan kaba saw bad ba san ki long u James Tamang bad u Bah Jobrenson Marweiñ kiba la pyndep ïa ka thong ha ka 44:05 minit bad 48:57 minit.
Haba phai pat sha ka liang ki kynthei, ka nongjop dei Bitaris Marbañiang ba la pyndep ïa ka thong ha ka 51:35 minit, ba wan ba-ar dei Starina Jasain iba la pyndep ïa ka thong ha ka 53:15 minit bad ba wan ba-lai dei Smarles Marweiñ ibala lah ban pyndep ïa ka thong ha ka 53:30 minit, katba ki nongmareh ba la bat ïa ka kyrdan kaba saw bad ba san ki long Trissina bad Shyamali Chakraborty, kiba la pyndep ïa ka thong ha ka 55:21 minit bad 1:12:16.
Kumban shu pynkynmaw ba ha ka kyrdan ïakhun jong ka 21K Elite ki kynthei bad shynrang kiba wan ba nyngkong ba ar bad ba lai ki la ïoh ban khung ïa ka song pisa kaba long T. 1,50,000, T. 1,00,000 bad T. 50,000 bad kiba wan ba saw bad ba san ki la ïoh ban khung ïa ka song pisa kaba long T. 40,000 bad T. 20,000.
Katba ha ka ïakob mareh jong ka Meghalaya PRC shynrang bad kynthei ki ba wan ba nyngkong ba ar bad ba lai ki la ïoh ba kin khung ïa ka song pisa kaba long T. 30,000, T. 15,000 bad T. 10,000 bad mar T. 5,000 ïa 10 ngut kiwei pat ki nong ïa mareh. Katba ki nongjop ha ka ïakob mareh jong ka 10 K kynthei bad shynrang ki la ïoh ban khung ïa ka song pisa kaba long T. 30,000, T. 15,000 bad T. 5,000.
U kongsan ba la khaweh ïa ka lama ka jingsdang jong kine ki lai tylli ki jingïakob dei u Director ka tnat Sports & Youth Affairs u S. Awasthi (IAS) bad ha ka por ka jingsam ïa ki khusnam la wan ban don lang da u Sampath Kumar Commissioner Secretary, ha kaba la wan ban sakhi lang ruh da ki dkhot nongkit kam ka MSOA, nangta la ïadon lang ruh ki ophisar jong ka tnat Sports, ki DSO, ha ka jingïalang ba la pynlong ha ka shnong Mawsmai.
