Rung Pre-Quarter final ka Eva Wayne Marbaniang, yn ïakhun pyrshah ïa ka Nikhat Zareen

Shillong, Nohprah 21 : Ka Eva Wayne Marbaniang ka thei ïakura boxing jong ka jylla ka la ïoh ban rung sha ka pre-quarter final ha ka ka rynsan ïakura ba la tip kum ka 6th Elite Women National Boxing Championship kaba dang ïaid shaphrang mynta ha Bhopla, Madhya Pradesh.
Ka Eva Wayne Marbaniang ka la rung pre-quarter final hadien ba ka la pynliem noh ïa ka Pooja ka thei ïakura boxing na Delhi ha kaba kan sa ïakhun pyrshah ïa ka Nikhat Zareen jong ka Telangana kaba dei ruh ka World Champion.
Ka Melina Basaiawmoit kaba dei sa kawei ka thei ïakura jong ka jylla Meghalaya ka la rung sha ka pre-quarter final hadien ba ka la pynliem ïa ka Sonia Rana kaba dei na Odisha bad kan sa ïakhun pyrshah ïa ka thei ïakura jong ka Arunachal Pradesh.
Ki thei ïalehkai jong ka jylla kiba la shah rem noh ha katei ka rynsan ïakura ki kynthup ka Tredicia Lamare kaba la rem noh ha ka thei ïakura jong ka Sikkim bad ka Riteeka Sarki ka la shah rem noh ha ka thei ïakura jong ka Rajasthan.
Na ka liang ka Meghalaya Boxing Association (MBA) ka ai mynsiem bad kyrmen ba kine ki arngut ki nongïakura ba kin ïakhun tyngeh ha ka Pre-Quarter final kaban sa long lashai ka sngi Palei.
Kum ban pynkynmaw hangne, ka Meghalaya Boxing Association (MBA) ka la jied saw ngut ki nongïakura ban mihkhmat ïa ka jylla sha ka 6yh Elite Women National Boxing Championship kaba la sdang naduh ka 20 tarik bad kaban kut ha ka 26 tarik Nohprah 2022 ha Nongbah Bhopal, Madhya Pradesh.
Ki saw ngut kiba la shah jied ki kynthup ka Eva Wayne Marbaniang (50kg), ka Mellina Basaiawmoit (52kg), ka Tredicia Lamare (54kg) bad ka Riteeka Sarki (57kg).