Wan baar ka Ri-Bhoi ha ka 5th Meghalaya Games hadien ba ïoh takma 79 tylli
Pdiang burom ka RBDSA, sengbhalang ïa ki rang bad thei ïalehkai
Nongpoh, K’Lyngkot, 21: Ka Ri-Bhoi District Sports Association (RBDSA) ryngkat ki kynhun sengbhalang bapher baher mynta ka sngi kila pdiang burom ïaki rang bad thei ïalehkai jong ka Ri-Bhoi District kiba la leit ban ïashimbynta haka 5th Meghalaya Games kaba la long ha Tura bad kum ka District kaba la wan ba ar ha katei ka lympung hadien ba kala ioh ban khur haduh 79 tylli ki takma.
Ha kane jingpdiang burom ïaki nongialehkai kaba la pynlong ha ophis DTO, Nongpoh la wan ban ïa don bynta lang da u MLA ka nongpoh u Bah Mayral Born Syiem, Bah RB Shadap, President RBDSA ryngkat ki dkhot ryngkat ki nongïalam jong ki kynhun sengbhalang bapher bapher.
Kum ban shu pynpaw hangne ba ka Ri-Bhoi District kala wan ba ar ha katei ka lympung hadien ba kala ioh bna khur haduh 27 tylli ki takma ksiar, 22 tylli ki takma rupa bad 30 tylli ki takma rnong hadien jong ka East Khasi Hills kaba la wan haka kyrdan ba nyngkong.
Naka liang ki nongkren ha katei ka sngi kila ai ka jingïaroh ïa baroh ki rang bad thei ïalehkai jong ka Ri-Bhoi District kiba la lehkai bha haki thup jinglehkai bapher bapher bad wat ïa kito ki bym shym la poi sha ka thong ka jingjop, ba kin dang bteng ban kilan bad trei shitom ban pyndonkam hok ïaka sap kaba ki don.
Kila pynpaw ruh ka jingsngewkmen kaba khraw halor ka jinglah ban lehkai bha ki rang bad thei ïalehkai jong ka district watla kim don satia ki jaka lehkai bad ki jaka kilan kiba biang hynrei ka jingtrei shitom jong ki ka la rah ïaka burom jong ka district ba pyni sha ka pyrthei ba ki don shibun ki sap kiba mih na Ri-Bhoi haka liang ki kam ïalehkai sports.