Shillong, Naiwieng 24: Ka long ka burom bad ka nam ïa ka jaidbynriew bad ïa ka jylla baroh kawei hadien ba ki khynnah lehkai kickboxing hapoh ka lama jong ka All Meghalaya Kickboxing Association ki la wanrah nam da kaba khur 21 tylli ki takma ha ka 28th Senior, 27th Junior & Sub-Junior – Naitonal Kickboxing Championship 2024 ha Kerela.
Kane ka Championship ka la bteng saw sngi lynter ha kaba la sdang naduh ka 14 haduh 17 tarik u Naiwieng ha VK Krishna Menon Indoor Stadium-Kozhikode, bad la pynlong ïa ka da ka Kickboxing Association of Kerala (KAK) hapoh ka jingkhmih jong ka Indian Association of Kickboxing Organisation (IAKO).
Ka All Meghalaya Kickboxing Association ka la sei ïa 21 ngut ki khynnah lehkai – shynrang bad kynthei ban ïakhun ha kane ka Championship ha kaba baroh 21 ngut ki la ïoh ban khur takma, ba kynthup ïa 9 tylli ki ksiar, 6 tylli rupa bad 6 tylli ki rnong. Napdeng kine ka Iairisuk Syiem (Senior Full Contact 45 kg) ka la ïoh ïa ka nam Best Fighter.
Lyngba kitei ki takma ka kynhun Meghalaya ka la ïoh ban wan ha ka kyrdan ba lai (2nd Runners Up) hadien jong ka Orisa kaba la ïoh ïa ka kyrdan ba ar (1st Runners Up), katba ka Kerela ka la long ka kynhun lahduh.
Ha katei ka sngi kut, ka Ibahundaris KharSyiemlieh ka la kylla long ka kynthei ba nyngkong na Meghalaya ban ïohpdiang ïa ka burom 1st DAN (Degree) Black Belt (na bynta ka National Referee & Judge) ba la aiti da u S.S Harichandan IAKO National President bad Grand Master.
Haba kren sha ki lad pathai khubor na ka liang jong u Bah Samuel Hashah – President ka All Meghalaya Kickboxing, u la ai khublei ïa ki khynnah ïalehkai kiba la wanrah nam bad ruh ïa ki kmie ki kpa kumjuh ïa ki skul, ki college kiba la shah ïa ki khynnah ban leit ïashim bynta ha kane ka rynsan.
Shuwa ban pynkut, u Bah Samuel Hashah u la kyntu ïa ka sorkar ban leh ei ei na ka bynta kine ki khynnah kiba la khur takma lyngba ki lad jingïarap kum ka scholarship.
