Khliehriat, Naiwieng 24: Ka kynhun ïalehkai jong ka Diengshynrum SC kala kylla long syndon ka lahduh haka lympung ïalehkai phutbol jong ka kyrdan First Division bala pynïaid da ka East Jaiñtia Hills District Football Association hadien ba jop ïa ka final ha ka sngi saitjaiñ (23 tarik, Naiwieng, 2024) ha madan Artificial Turf, Diengshynrum, Khliehriat.
Ka shi kol na u Diamond Sympli ka la biang pura ïa ka Diengshynrum ban pynliem ïa ka Shilliang Umshong SC ha katei ka jingïakhun final. Ka jingbymlah thep kol na baroh arliang mamla ka la neh shi slem naduh ka kylla step bad dei tad ynda la jam sha ka khyllipmat ba khadduh, kata ha ki minit pynjlan jong ka por ba ka Diengshynrum SC lyngba u Diamond (90+2) ka la ïoh ban thep ïa katei ka kol ban long syndon ka lahduh ha kane ka kyrdan mynta u snem.
Ïa kane ka lympung la wan ban pynhap pyrda da u Ma Tiufill Shadap kum u Kongsan, ha ka jingdonlang u Ma Delmi Shylla kum u symbud kongsan, ma Finelyness Bareh (EM JHADC) ma Kor Sympli, ma Kerlang Ksoo (Advocate), ki Waheh Shnong & ki riew paw khmat napoh District East Jaiñtia District bad ki nongkitkam ka EJHDFA.
Nalor ka khusnam lahduh la ïohruh ban sam khusnam sha ki rangïalehkai ba kynsai, ha kaba ïa ka nam ‘Player of the Match’ la ïoh rah da u Fadical Pohshna na ka Diengshynrum SC, nangta ïa ka nam ‘Player of the Tournament’ la ïoh da u Josme Ryngkhlem na ka Wahiajer Narpuh YSSC, ïa ka nam Best Goalkeeper la ïoh da u Yoomeki Dkhar na ka Shilliang Umshong SC, ïa ka ‘Top scorer’ la ïoh da u Henjoymang Khongsai na ka Shilliang Umshong SC uba la thep haduh 8 kol.
Ki la don ruh ki khusnam ba kyrpang ba kynthup ïa ka kol kaba itynnat tam jong ka lympung lane ‘Goal of the Tournament’ kaba la ïoh da u Hikaidame Bareh na ka R.Synrang Shahkhain SC, katba ka Wahiajer Narpuh YSSC ka la ïoh ïa ka nam Best Team ha kane ka lympung.
