Nongpoh, Naiwieng 23: Hadien ka jingïaid shaphrang jong ka lympung ïalehkai phutbol bala tip kum ka 10 A SIDE Football Tournament bala pynlong da ka Raid Nongkyrla, ha madan ïalehkai ka shnong Dehal Bagan haka thaiñ Byrnihat, katei ka lympung kala poi noh sha ka ba kut mynta ka sngi hadien ka jingïakhun phainal kaba shongshit hapdeng ka 20 mer FC pyrshah ïaka Byrnihat Proper FC.
Ïa katei ka lympung la wan ban pynhap pyrda noh da u Bah Phrangsngi Syngkli, Lyngdoh Raid ka Raid Nongkyrla kum u kongsan haka jingdonlang u Bah Livingstone Nongrum Secretary ka Raid Nongkyrla, u Bah Johny Syiem Secretary ka Synjuk ki Rangbah Shnong, Byrnihat Area, ki Rangbah Shnong, ki nongïalam ka Raid Nongkyrla bad kiwei kiwei ki riew rangbah.
Ha katei ka lympung ïalehkai ba khlem bai rung kumba 38 tylli ki kynhun kila wan ban ïashimbynta, hadien ba ka Dorbar Raid hapoh ka jingïalam u Lyngdoh Raid u Bah Phangsngi Syngkli kila shim ïaka sienjam ban pynlong da katei ka lympung naka bynta ban lum ban lang ïaki samla hapoh ka Raid khatam ban wanrah ruh ka jingïajan bad ka jingïatylli jong ki shnong ki thaw hapoh ka Raid.
Ha katei ka jingïakhun phainal kaba shongshit hapdeng ka 20 mer FC pyrshah ïaka Byrnihat FC la wan ruh ban sakhi da ki hajar ngut ki paidbah jong ka Raid Nongkyrla, ha kaba ka jingïakhun kala long kaba itynnad bad ïakhaid bha namar tang hapdeng ka minit ba sdang jong ka kylla step ka 20 mer FC kala ioh ban pynkhih nyngkong ïaka jar hynrei da ka jingtrei shitom ki rangïalehkai ka Byrnihat FC kila ioh ban pynphai shuwa ban kut ba kylla step.
Haba phai sha ka kylla miet, ka jingïakhun kala nang kham khluid shuh shuh ha kaba ka Byrnihat Proper kala ioh ban thep sa 3 kol ban rah syndon ïaka nam lahduh jong katei ka lympung da kaba pynliem noh ïaka 20 mer FC da 4-1 kol.
Naka liang ki bor pynïaid kila sam ruh da ka song pisa sha ka kynhun kaba jop bad kumjuh ruh kaba rem ryngkat ki trophy bad la sam ruh ïaki khusnam shimet bad ki bor pynïaid kila pyntip ruh ba katei ka tournament yn bteng ban pynlong man la u snem ban kyntiew ïaka kam ïalehkai hapoh ka Raid baroh kawei.
