Shillong, Naiwieng 24: Ka kynhun ïalehkai phutbol jong ka Meghalaya ka la lah ba kan ïakhun tyngeh bad ïakhaid pyrshah ïa ka Assam da mar 1-1 kol kaba la pynthikna ïa ka Jylla ban ïohrung sha ka wat ba khatduh (final round) jong ka Senior Men’s National Football Championship na ka bynta ka Santosh Trophy 2024-25 ha Nalbari, Assam, ha ka sngi U Blei.
Da kaba ïakhaid shi sien bad jop ar sien ïa ka Nagaland bad ka Arunachal Pradesh, ka Meghalaya ka la ïoh ban bat hi ïa ka kyrdan ba nyngkong na ka Group E ha ka wat ïakhun preliminary round ha kaba ka la kamai 7 poiñ. Kumba la kdew barabor, tang ka kynhun kaba wan hakhliehduh na man ki Group kan ïohrung sha ka wat ba khadduh (final round) jong ka Santosh Trophy.
Na bynta kane ka jingïakhun, u coach ka Meghalaya u Bah Hering Shangpliang u la pynkylla tang ïa u wei u player na bynta ka kynhun ban ïalehkai naba sdang, da kaba wanrah ïa u Baiaikara Swer ha ka jaka jong u Kevin Rymbai ban shim ïa ka bynta ban ïalehkai pdeng madan (midfield).
Ka Meghalaya ka la tip lypa shuwa ban jam sha kane ka jingïalehkai kaba ha ka sngi U Blei ba ka donkam ïa ka jingïakhaid ban ïohrung. U Damanbhalang Chyne u la ai jingkyrmen ïa ka kynhun da kaba buh ïa ka Meghalaya hakhmat ban pynkhih ïa ka kol ha ka minit kaba 56 ha ka kylla miet.
Kane ka la neh shipor naba ka Assam ka la ïoh ïa ka penalty ha ki minit shuwa ban kut bad khlem da pynsepei u Dipu Mirdha (88’) u la lah ban pynïakhaid ban ai jingkyrmen ïa la ka kynhun ban ïoh biang ïa ka jingjop. Hynrei, ka Meghalaya ka la ïakhun pyn-eh triang haduh kaba kut bad ka jingïakhun ka la kut ha ka jingïakhaid da mar 1-1 kol.
Hadien ba la kut ka jingïalehkai, u Damanbhalang u la ïoh ïa ka nam Player of the Match.
Ka kynhun ïalehkai ka Meghalaya ka la ïoh jingkyrshan bha ha madan ha katei ka sngi na u Bah Hamletson Dohling – President ka Meghalaya Football Association, u Bah Sunesh Syiem – General Secretary ka MFA bad u nongai jingmut jong ka sorkar Meghalaya u Bah HM Shangpliang, kiba la leit sha Nalbari ban ai mynsiem ïa ka kynhun ïalehkai.
Ki nongjop jong kawei pa kawei na ki khyndai tylli ki Group kin ïasohlang ha ka wat ba khadduh (final round) ryngkat bad ki kynhun ba poi final ha ka samoi ba la dep, kata ka Services bad ka Goa bad ka Telangana kaba ïoh pynlong ïa kane ka lympung mynta ka samoi. Ka Meghalaya ka la shah pynïakap ha ka Group B ryngkat bad ka Goa bad Tamil Nadu, Kerala, Delhi bad Odisha.
Ki rangïalehkai jong ka Meghalaya ba mih madan ha ka sngi U Blei ki long:
Siwel Rymbai (GK), Overkindness L Mawnai, Arlangky Nongsiej, Donborlang Nongkynrih (sub Banraplang Pyngrope 45’+4), Wanboklang Lyngkhoi, Aibiangmame Nongneng (sub Fairming Suting 77′), Robertson Khongriah, Fullmoon Mukhim, Damanbhalang Chyne, Baiaikara Swer, Donlad Diengdoh (sub Aenam Jyrwa 90′).
