Shillong, Nailar, 20: U Myntri ka tnat Bording ka Sorkar Jylla u Abu Taher Mondal ha ka sngi Baar ula ïathuh ba ka Sorkar ka la thawlad ban wad surok nawei ban pynthikna ba baroh ki kali kin dup lah ban rung sha nongbah Shillong khlem da ïaid lyngba ïa ka jingkieng Umïam.
Ha ka jingïakren bad ki lad pathai khubor, u Mondal u la ong ba ha kaba ïadei bad ka ISBT ha Mawiong, yn sa pyndonkam shipor ban pynlong kum kawei ka surok kaba yn sa pynïaid ïa ki kali.
“Ka Sorkar ka la ïakren bad ki Consultant bad ki dang bishar bniah ïa kane ka kam ban wad surok nawei khnang ba baro hki kali kin dup lah ban wan rung sha Shillong,” u la bynrap.
U Mondal shuh shuh u la ong yn ym pat lah satia ban weng noh ïa ka jingkhang ïaid kali kiba heh na jingkieng Umïam.
“Ka jingpyrkhing ïa ka jingïaid kali na jingkieng Umïam kan dang neh beit namarba ka jinglong jingman jong ka jingkieng kam pat da skhem bha bad ngin ym pat lah satia ban weng noh ïa ka jingpyrkhing,” u la bynrap.
“Katkum ka jingïathuh jong ki consultant, ki la pyntip ba ym dei ban shah ïaid ïa ki kali kiba kit khia 9 metric tonne ban ïaid lyngba na ka jingkieng bad dei na kata ka daw ba ngi la pyrkhing,” u la ong.
